Tjóðveldisflokkurin hevur givið Torbirni Jacobsen, mentamálaráðharra, sína seinastu ávaring, og tað hevur løgmaður Anfinn Kallsberg eisini. Mánadagin verður spurningurin um Grundlógardagin tikin upp á landsstýrisfundinum, og løgmaður hevur longu boðað frá, at hetta mál hevur fingið skeiva politiska viðgerð. Løgmaður góðtekur ikki hesa mannagongd, sum Torbjørn Jacobsen hevur valt og vil hava spurningin um Grundlógardagin viðgjørdan á landsstýrisfundinum mánadagin, tí spurningurin er, um mentamálaráðharrin hevur lógina aftan fyri seg í hesi broyting, hann longu sigur seg hava framt.
Viðvíkjandi spurninginum, um løgmaður hevur fyrigivið mentamálaráðharranum og seinasta orð er talað í leigusveina-skuldsetingini móti løgmanni, so er Anfinn Kallsberg nøgdur við treytaleysu umberingina frá Torbirni Jacobsen. Í viðmerking við Internetsosialin sigur løgmaður, at alt hetta málið viðvíkjandi Torbirni Jacobsen kann setast undir 3 punkt. Tey umfata bæði frídagabroytingina, sum mentamálaráðharrin hevur boðað frá, øll tíðindaskrivini frá mentamálaráðharranum og so eyðmýkjandi umberingarnar.
Ikki nógvar tímar
? Um tað allar minsta »dukkar upp« nú, so veit mentamálaráðharrin, hvat klokkan hevur sligið, sigur løgmaður, sum hevði kunnað Tjóðveldisflokkin um sína støðu beinanvegin og gav Tjóveldisflokkinum ikki nógvar tímar at umráða seg í.
Og viðvíkjandi spurnginum um álit millum partarnar nú, sigur løgmaður í sera fáum orðum, at mentamálaráðharrin hevur fingið ein møguleika afturat.
Men hvar markið er sett framyvir, er ikki lætt at úttala seg um, og tað hevur løgmaður heldur ikki neyvt sett, men í hvussu so er, hevur løgmaður fyri seinastu ferð boðað mentamálaráðharranum frá, at tað er ikki alt loyvt, tá ið tú situr í landsins hægstu embætum.
