Tað eru longu fleiri ár síðan, at vit fingu tey fyrstu undirhúsini kring landið, og seinnu árini eru fleiri komin aftrat.
Ymiskt er, hvussu hesi undirhús verða rikin, og ymiskt er eisini, hvussu tey vera vitjað.
Nú skulu vit ikki fara út í smálutir, tá vit ikki vita neyvt, hvussu er kring alt landið, men eitt nú í bátafelagshúsinum á Bakka á Glyvrum koma bæði yngri, tilkomnir og eldri menn inn á gólvið - og á Toftum, har undirhúsið enn bert hevur nøkur ár á baki, hava teir enntá eitt sangkór, sum luttekur við ymisk høvi.
Undir-og yvirhús
Í Skopun hava teir eisini undirhús - og hurðin beint hinumegin og í sama bygningi er yvirhúsið, har skrivstovan hjá bygdarráðnum heldur til.
Í Skálavík er eisini undirhús, og her eru bæði gamlar og nýggjar myndir, sum gera hølini hugnalig og viðkomandi fyri tey, sum vitja innar.
Tað eru fleiri aðrar bygdir sum hava undirhús, summi eru nýggjari, og summi hava verið í fleiri ár.
Felags fyri undirhúsini er, at tað eru eldri menn, sum savnast til kaffi, prát og samveru. Hetta er serliga fyrrapartar, men onkrastaðni verður so vitjað inn aftur á gólvið, sum seinnaparturin gongur.
Georg aldursforseti
Á Strondum er undirhúsið lutfalsliga nýtt, men sum skilst hevur húsið í bygdini fingið góða undirtøku, síðan tað læt upp.
At aldursforsetin í undirhúsinum á Strondum og ein av ábyrgdarunum á altjóða kvinnudegnum fylti 91, sigur okkum, at teir gomlu eisini taka væl undir við hesum tiltaki.
Aldursforsetin, Georg Abrahamsen, fylti nevniliga 91 ár leygardagin, og hetta varð sjálvsagt feiðrað við góðari lagkøku.
