Petur Joensen er fegin um tann partin av samgonguskjalinum, sum snýr seg um kolvetni. Har stendur m.a.:
”Samgongan fer at fáa lýst tey árin á og teir møguleikar fyri føroyska samfelagið, sum kunnu standast av eini møguligari oljuvinnu innan umhvørvi, mentan, sosiala økið og arbeiðsmarknað.”
–Hetta haldi eg vera sera skilagott, tí tað er altíð gott at vera uppá forkant við útviklinginum sigur Petur Joensen, sum sjálvur í samrøðu við Sosialin herfyri legði stóran dent á at fara undir arbeiðið longu nú at kanna avleiðingar av eini oljutilgongd við møguligum stórum oljufundum. –Eg kann bert taka fult undir við hesum setningi, sum landssstýrið hevur sett sær. Tað er fult í tráð við mína egnu áskoðan um, at tað er betri at vera fyrivarðin heldur enn eftirsnarðin. Petur Joensen sigur, at hóast vit enn onga olju hava funnið, so kann tað broytast bráddliga, og tá tað hendir, eiga vit at hava sett út í kortið framtíðar ætlanir fyri, hvussu vit tacla tær avbjóðingar, sum ein oljuvinna hevur á føroyska samfelagið. (Jan)
