Fríggjadagin, tá Skiftirættarfundur var um samtakið Faroe Seafood, kom fram, at ein leigusáttmáli lá klárur til undirskrivingar við ein ?aktør? í føroysku fiskuvinnuni. Sáttmálin snýr seg um, at aktørurin vil leiga teir seks ísfiskatrolararnar í dóttirfelagnum Faroe Fish 2, eins og aktørurin eisini ynskir at leiga nøkur av fiskavirkjunum í trotabúnum.
Eyðfinnur Jacobsen, bústjóri, sigur við Rás2 í morgun, at partarnir í prinsippinum eru samdir um leigusáttmálan, sum kortini ikki er vorðin virkin enn.
- Enn eru nakrar treytir, sum skulu uppfyllast, og eitt nú skulu ávís viðurskifti í sáttmálanum góðkennast av Fiskimálaráðnum. Flestu veðhavarar aftanfyri trotabúgvini hava eisini givið sítt viðmæli, men enn vantar onkur góðkenning.
Eyðfinnur Jacobsen heldur, at tað gongur framá at koma undir land við eini leiguavtalu, sum kann bera á mál.
