Tað serliga avgjaldið, samgongan legði á bensin og diesel í 2016, verða ikki tikin av aftur. Tað skiltist á øllum brøgdum á Akseli V. Johannesen, løgmanni, nú Løgtingið viðger fíggjarlógina fyri næsta ár.
Bjørn Kalsø, løgtingsmaður fyri Sambandsflokkin, spurdi hann, um nøkur ætlan er um at avtaka tað serliga avgjaldið aftur, sum varð lagt á bensin og diesel í 2016. Hann vísir á tá ið samgongan legði eitt serligt avgjald á bensin og diesel, førdi samgongan fram, at prísirnir vóru so lágir, at hóast avgjaldið varð lagt á, fór bensin og diesel kortini at kosta minni, enn tað hevði gjørt.
Tí varð eitt serligt avgjald upp á 25 oyru lagt á bensin og eitt avgjald upp á 30 oyru varð lagt á diesel.
Men Bjørn Kalsø vísir á, at síðani eru prísirnir á bensini og diesel hækkaðir munandi aftur. Nú kostar ein litur av bensini yvir 10,50 krónur og ein litur av diesel kostar slakar níggju krónur liturin. Og tí vildi hann hava at vita um avgjaldið nú fer at verða avtikið aftur.
Í fjør tjenti landskassin 14 milliónir krónur upp á hesa hækkingina og tað var týðiligt á løgmanni, at ætlanin er ikki at avtaka avgjaldið aftur.
Hetta er aftur eitt uppskot, sum hevur til endamáls at minka um inntøkurnar hjá landskassanum, staðfestir hann. Men hann vísti á samstundis sum at avgjaldið varð hækkað, varð eisini skatturin lækkaður hjá teimum, sum ikki hava so góða løn.
– Inntøkurnar av avgjaldinum eru væl farnar, tí tær eru brúktar til at lækka skattin hjá lágløntu, sigur løgmaður.
Og harafturat fingu tey, sum hava langt at koyra til arbeiðis, eisini ein fyrimun, tí tilskotið til at koyra til og frá arbeiðið, varð somuleiðis hækkað.
