Jógvan Páll Lassen, sum er verji hjá manninum, sum er ákærdur fyri at hava barnaporno og spreiða tað víðari, heldur fast við, at maðurin ikki visti, at hann sendi tilfarið, sum hann heintaði niður á sína teldu, víðari.
Hann noktar ikki fyri, at tilfar er sent víðari, men sigur, at tað ikki hevur verið tilvitað og tí ikki er revsivert í hesum føri.
Jógvan Páll Lassen vísir á, at soleiðis sum slík forrit eru uppbygd, so hevur ákærdi ikki sent eina einastu mynd ella ein einasta film víðari í heilum líki. Teldurnar heinta brot av fílunum frá ymiskum veitarum og talan er tí um brotpartar, sum eru farnir víðari av telduni hjá manninum. Hetta sæst eisini aftur í dátumongdini, sum maðurin hevur sent víðari. Talan er um 0,1 gigabyte ella 100 megabyte.
Verjin vísti á, at tilfarið, sum er farið víðari av telduni hjá manninum, eisini er at finna hjá túsundtals av øðrum brúkarum av forritinum. Tað er tí rein tilvild, at tey, ið hava heintað tilfarið, fáa tað júst frá ákærda. Verjin vísti á, at alt, sum er farið víðari, eins væl kundi verið komið frá øðrum.
- Ákærdi hevur ikki tilvitað deilt nakað, hann hevur ikki gjørt nakra avtalu við nakran um at senda nakað, hann hevur ongantíð verið í samband við onnur um slíkt tilfar. Um ákærdi ikki sendi víðari, so høvdu fólk kortini fingið fatur á tilfarinum. Tí er tað órímiligt, at hann verður sæddur sum ein, ið breiðir tílíkt út, førdi Jógvan Páll Lassen fram í rættinum.
- Uttan at vita av tí, er maðurin fangaður í einum neti, sum heintar barnaporno frá hvørjum øðrum. Maðurin hevur ongantíð ætla at senda barnaporno víðari og hevði steðgað, um hann visti av tí, segði Jógvan Páll Lassen.
Verjin fanst eisini at, at ákæruvaldið ikki hevur upplýst, hvussu dátumongdin fordeilir seg millum bólkarnar. Hann kundi hugsað sær at vita, hvussu langir filmarnir eru og hvussu lutfallið er millum minuttir av filmum í bólki 1, 2 og 3.
Jógvan Páll Lassen bað um, at maðurin ikki fær eina harðari fongsulsrevsing enn eini fýra, fimm mánaðir. Hann vísti á, at maðurin hevur játtað seg sekan og ognantíð hevur sett seg móti løgregluni í kanningararbeiðinum. Orsaka av høga aldrinum hjá manninum og at málið hevur tikið so langa tíð hjá løgregluni at viðgera, bað hann um, at fongsulsrevsingin eisini verður treytað. Verjin vísti á, at maðurin longu hevur verið revsaður sosialt, við tað, at tíðindini um málið er likið út og fólk vita í stóran mun, hvønn talan er um. Hetta hevur í stóran mun ávirkað gerandisdagin hjá manninum.
Skuldi dómarin kortini dømt mannin sekan í at senda barnaporno víðari, heldur verjin, at seks, sjey mánaðir hevði verið ríkiligt, við tað at mongdin, sum ákærdi hevur sent víðari er so avmarkað og at hetta er hent uttan at hann hevur verið tilvitaður um tað.
