Fleiri av stóru fakfeløgunum geva ilt av sær í yvirlýsing, sum varð send út í gjár.
Tey eru í øðini um, at tvungin uppsparing er upp á tal fyri at steðga búskaparligu gongdini í landinum, og tey hótta við umfatandi tiltøkum, verður slík uppsparing sett í verk.
? Leggur landsstýrismaðurin við fíggjarmálum lógaruppskot fyri tingið um tvungna uppsparing, verður tað tikið sum beinleiðis ágangur móti fakfelagsrørsluni, og so kenna vit okkum noydd at seta tiltøk í verk. Og tað verður neyvan við mýkindum, skriva fimm fakfeløg í eini felagsyvirlýsing
Yvirlýsingin, sum er gjørd av Handverkarafeløgunum, Sjúkrasystrafelagnum, Stavsmannafelagnum, Havnar Arbeiðskvinnufelag og Føroya Arbeiðarafelag, er ætlað sum ein ávaring til landsstýrið.
Boðini eru greið: Haldið tykkum lagt burtur frá tiltøkum, sum raka vanliga løntakaran, tí annars...
Hav ikki ráð
Í harðliga mótmælinum frá fakfeløgunum verður sagt, at ein tvungin uppsparing fer at raka vanliga løntakaran meint, og uppsparingin fer at beina fyri teimum fyrimununum, sum løntakarin vann sær í seinastu sáttmálasamráðingunum.
? Vit fara ikki at góðtaka eina slíka ráðagerð móti tí samfelagsbólki, sum seinastu 10 árini hevur kent sviðan av tí samfelagskreppu, sum varð skapt av politiskum ódgunaskapi í áttati- og nítiárunum, siga feløgini.
Fakfeløgini halda, at ein skipan við tvungnari uppsparing at kollrenna tær ætlanir, sum fleiri av fakfeløgunum hava um eina eftirlønarskipan.
? Eingin vanligur løtakari fer at hava ráð at gjalda bæði til tvungna uppsparing og til eina eftirlønarskipan.
Fakfeløgini biðja landsstýrismannin við fíggjarmálum leggja ætlanina um tvungna uppsparing til viks í stundini.
