Hans Harryson, lektari í námsvísindum á Námsvísindadeildini, hevur givið eina vísindaliga grein út í íslendska tíðarritinum Netla, skrivar setur.fo.
Greinin tekur støði í teirri sannroynd, at lærarayrkið er undir stórum trýsti í fleiri av Norðurlondum.
Færri og færri ung vilja gerast lærarar. Fleiri og fleiri av teimum, ið fara undir læraralestur, gevast á hálvari leið. Og ein størri og størri partur av nýútbúnum lærarum fara úr starvi eftir fáum árum.
Úrslitið av hesi gongd er, at í fleiri norðurlendskum fólkaskúlum hevur ein triðingur ella ein fjórðingur av undirvísarunum ikki læraraútbúgving, skrivar setur.fo.
Hetta óhepna rákið sæst ikki í Føroyum enn. Men tað er týdningarmikið, at tey, ið varða av skúlaøkinum, eru á varðhaldi.
Greinin, ið Hans Harryson hevur skrivað, hevur heitið "Five Quality Indicators: An Analytical Framework for Evaluating Teacher Education".
Í greinini leggur høvundurin ein metingarfrymil fyri lesaran, ið vísir, hvørji dygdarbarometur ein eigur at hava fyri eygað, tá ið ein skal meta um læraraútbúgvingina í síni heild, og tá ið ein skal taka støðu til, hvussu útbúgvingin kann styrkjast.
Greinin kann lesast her.
Í apríl 2025 gav Fróðskaparrit út greinina “Praktikvejlederens primære opgave i læreruddannelsen. – Et Mixed-methods studie blandt lærerstuderende på Færøerne”. Í hesi greinini kannar Hans Harryson tann leiklut, ið starvslæruvegleiðarar hava í føroysku læraraútbúgvingini.
Tann greinin kann lesast her.
