Tá tað var komið eitt sindur út á seinnapartin fríggjadagin, fór pulsurin spakuliga upp inni á frálíka vertshúsinum, Brauhaus Ernst August, sum liggur mitt í býnum í Hannover, og sum – eins og fyri 10 árum síðani – var savningardepil hjá føroysku fjepparunum, ið komu við bussum til Týsklands.
Hvørja ferð ein nýggj sending av fjepparum kom, kom róp í, so tað rungaði eftirí í allari Schmiedestraße. Men allíkavæl fór alt hampuliga og friðarliga fram, og politistarnir, sum sótu í einum myrkabláum rugbreyði hálvthundrað metrar frá vetshúsinum og eygleiddu góða hýrin, kundu fyri tað fingið sær ein blund, tí her var tann beri gangur – men annars friður.
Jú, byrjanin hjá fjepparunum var góð, og tað skuldi bara gerast enn betri. Teinurin til AWD Arena, har dysturin skuldi spælast, var ikki longri enn so, at ein føroysk skrúðgonga fór syngjandi og rópandi avstað, og allastaðni stegðaðu ovfarnir týskarar upp og gløddu at føroyingunum, sum høvdu teir ikki sæð ordiligar fjepparar har um leiðir fyrr.
Onkur teirra kanska læt tankarnar leita 10 ár aftur í tíðina, tí ta ferðina var talan um reinan uppvísning á føroysku áskoðaraplássunum, umframt at liðið á vøllinum eisini gjørdi tað framúrskarandi. So mikið væl eydnaðist tá hjá fjepparum og spælarum oktoberkvøldið í 2002, at týska fjøldin ýldi og bríkslaði eftir sínum egnu, men klappaði fyri og fagnaði føroyingunum.
Karaoke-tjóðsangur
Hóast vit fjølmiðlafólk vóru borin á lógvum av týsku fyriskiparunum, sum eisini fingu greitt onkra fløkju í evstu løtu við einum brosi, var ikki sørt, at ein fekk skálkin við tí ólukkudýrinum, ið skuldi eitast fyri at standa fyri ljóðtøkni og vali av tónleiki, tá tjóðsangirnir vóru á skránni.
Tá um okkara egna tjóðsang umrøður, er og verður framvegis galdandi, at tann sál og tann andi, sum hoyrist í avgomlu upptøkuni í turkihúsinum á Skála, ikki kann endurskapast, so gásarholdið verður tað sama. Í øllum førum fingu vit í Hannover fríggjakvøldið staðfest, at slíkt skal ikki pilkast við – og vónandi hevur eingin smartur fýrur í FSF-húsinum havt ein fingur við í spælinum!
Føroysku fjeppararnir høvdu væl og virðiliga hitað sær røddirnar upp og vóru 120 prosent klárir at syngja fyrsta vers av »Tú alfagra land mítt«. Men tá uppsparda orkan skuldi leggjast í tjóðsangin, streymaði ein láturlig karaoke-útgáva upp á speed út úr týsku hátalarunum, og í besta Michael Schumacher-stíli drønaði tónleikurin langt undan sanginum, so tað gjørdist heilt pínligt at uppliva.
Bara hetta var í sjálvum sær so smakkleyst og vánaligt, at vit passandi kundu hevnt tað, tá Týskland kemur higar at spæla. Vit kundu kanska fingið Johan í Kollafirði ella Swangah Dangah at rappað fyri, meðan týskararnir kundu sloppið at haltað aftan á »die dritte Strophe«, sum í mun til okkara tjóðsang er triðja vers í teirra – tí fyrsta og annað vers eru bannlýst og ikki mugu syngjast longur…
Er tað veruliga so, at onkur hevur tikið Jógvan við Keldu upp á orðið og hevur gjørt eina uppskrúvaða útgávu av tjóðsanginum, so er at stíga fram og taka ábyrgdina av tí. Hetta var ræðuligt og eigur ikki at endurtaka seg, so til komandi útidystir eiga fólkini frá Fótbóltssambandinum at hava bæði geymar, fløgur og alt møguligt annað við røttu útgávuni av tónleikinum til okkara tjóðsang!
Ofraðu seg fult út
Alt hetta vísti seg tó tíbetur ikki at fáa nakra óhepna ávirkan á føroyska innsatsin – hvørki á vøllinum ella uttanfyri. Føroysku fjeppararnir koyrdu á og inni á vøllinum vóru føroysku spælararnir topptendraðir og fyrsta hálva tíman tveittu teir seg við góðum úrsliti fyri alt, ið bara kundi líkst eini týskari atsókn. Her sóu vit eitt føroyskt landslið, ið ofraði seg fult út fyri sakini, tí tað er einasti mátin, tá tú innast inni veitst, at á pappírinum eru týskararnir favorittar í tólv av hvørjum tíggju førum…
Og tá talan so bleiv um veruligar skotroyndir, ið sluppu ígjøgnum føroysku barrikadurnar, var Gunnar Nielsen tryggur sum aftasti skansin við eini røð av meira og eitt sinur meira fantastiskum bjargingum. Hann fekk staðfest við fimm tumma seymi, at hann ikki bara er ein framtíðar maður í føroyska málinum, men at hann fríggjakvøldið allarhelst longu ognartók málið, soleiðis sum hann í løtum spældi í sonnum heimsklassa!
Framman fyri hann runnu bæði verja, miðvøllur og sjálvt álopið sólina svarta, og hóast eingin í 28. minutti ordiliga fann útav, hvat Mario Götze var úti uppá, fyrr enn ov seint var, so hildu føroyingarnir fram við at stríðast og kempa. Og áskoðararnir játtaðu ferð eftir ferð sína turkatrúgv og fylgdu sínum monnum á vøllinum og eggjaðu teimum til.
Undan týska leiðslumálinum var føroyska verjuspælið vinnarin, og satt at siga, so var tað bara mexikanska bylgjan uttan fyri vøllin, sum týskararnir ordiliga fingu at rigga. Og á vøllinum riggaði einki, fyrr enn Mesut Özil gavst við at skjóta í blindum og í staðin tók seg eitt sindur longur aftur, so hann kundi dirigerað »Die Nationalelf« uttan um teir boðar og tey sker, føroyska liðið streiddi um seg á vøllinum. Og at enda átti hann seinasta fótin á hinum báðum málunum, ið fullførdu 3-0 sigurin.
Vinna til síðst!
Sæð við føroyskum eygum, var av sonnum talan um eina fantastiska heild, ið stóð saman ímóti sterka yvirvaldinum, tí tað munnu vera tey fægstu, ið vænta sær nakað sum helst burtur úr einum dysti á útivølli ímóti Týsklandi, ið samanlagt man vera heimsins sterkasta fótbóltstjóð ígjøgnum tíðirnar. Og hóast tað ikki bleiv til tað stóra spælið á týsku hálvuni, burtursæð frá fyrstu trimum minuttunum, tá vit lógu framvið einar tvær ella tríggjar ferðir, áðrenn týskararnir høvdu fingið fíninnstillað sær verjuspælið.
Tað tað ráddi um at fáa okkurt álop og onkra atsókn í lag, var orkan ikki ordiliga til tað, tí tað krevur so sanniliga sítt, tá føroyskir amatørar skulu taka dystin upp við týsku millióningarnar, ið ikki gera annað enn spæla fótbólt, hugsa fótbólt og liva fótbólt. Í einum slíkum ketli slepst ikki undan, at bæði temjingar og taklingar kundu verið betri, men øðrvísi fær tað helst heldur ikki verið, til vit hava funnið olju…
Gloyma vit fúla kiksaran við tjóðsangi okkara, so skerst ikki burtur, at karmarnir um dystin vóru teir allarbestu, og fáir leikvallir kring heimin munnu vera deiligari enn AWD Arena, sum út í fingraspíssarnar er snikkaraskorin til fótbóltsupplivingar sum hesar. Føroysku spælararnir síggja út til at trívast har, og tað gera føroysku fjeppararnir so sanniliga eisini. Og tað er altso stuttligt at kunna staðfesta, at av teimum tilsamans 32.769 áskoðarunum fríggjakvøldið, vóru tað teir 5-600 føroysku, ið hoyrdust nógv best – og longst.
Vit mugu bara ásanna, at fótbóltur er eitt spæl, har ellivu eru ímóti ellivu og bólturin rundur – og føroysku fjeppararnir vinna til síðst!
