Mikudagin skipar Fróðskaparfelagið fyri fyrilestrarkvøldi, har ætlanin er at lýsa skógir og náttúrufatanir í Føroyum.
Hesin fyrilesturin verður hildin í sambandi við, at í 2011 verður kring allan heimin varpað ljós á heimsins skógir. ST-felagsskapurin hevur gjørt av at heiðra skógirnar í ár í tí, tey kalla International Year of Forests.
Eisini í Føroyum verður skipað fyri tiltaki, ið lýsir og viðger skógir og náttúrufatanir úr einum føroyskum, fakligum sjónarhorni.
Hetta fyrilestrarkvøldið byrjar klokkan 19 við einum fyrilestri, ið Tróndur Leivsson, landsskógarvørður á Umhvørvisstovuni kallar: Viðarvøkstur í Føroyum. Eftir tað fer heimsspekingurin Jógvan Hansen, sum er kendur úr útvarpssendingini Filosoffarnir at tosa um evnið: Náttúrusýni millum fakta og virði.
Eftir fyrilestrarnar verður høvið til kjak og spurningar.
(Mynd:wiberg.fo)
