Suni Vinther, formaður í Reyða Krossi Føroyar, segði við Rás2 fríggjadagin, at hóast herviligar myndir, so hava neyðstøddu fólkini ikki fingið stórvegis hjálp úr Norðurlondum.
Aftaná vanlukkuna í Haiti, savnaðu føroyingar gott og væl 1.2 milliónir krónur í neyðhjálp. Landsstýrið gav eisini 150.000 krónur í hjálpararbeiði.
Súni Vinther segði við Rás2, at munurin á vanlukkuni í Haiti og í Pakistan er, at miðlarnir hava ikki varpað eins nógv ljós á Pakistan.
Nú hevur Uttanríkisráðið, umvegis Reyða Kross Føroyar, veitt Pakistan stuðul. Peningurin fer til telt, køksútbúna og útgerð at fáa reint vatn.
ST upplýsir, at fleiri enn 1.200 fólk hava latið lív, og tvær milliónir fólk hava mist hús og heim. 14 milliónir fólk eru rakt av vanlukkuni, sum hevur oyðilagt grøðina, vegir og brýr.
Pakistan hevur 170 milliónir íbúgvar.
Politikken skrivaði fríggjadagin, at hjálparfelagsskapirnir skulu verða varnir við at spyrja um stuðul frá fólki, tí tað tykist sum, at fólk eru troytt av at lata pening til fólk í fjarskotnum londum.
