At virka fyri størri javnstøðu millum kynini er ein almenn uppgáva. Tað heldur í øllum førum ein stórur meiriluti av føroyingum.
Í eini kanning, sum Gallup hevur gjørt fyri Javnstøðunevndina, siga 66 prosent seg vera samd í, at tað er ein almenn uppgáva at arbeiða fyri at fremja javnstøðu millum kyn í samfelagnum.
Tað eru heldur fleiri kvinnur enn menn, sum halda tað vera best, at tað almenna tekur sær av javnstøðuni millum kynini.
Nøkur eru tó ósamd. Í Gallup-kanningini søgdu 24% seg vera ósamd í, at tað er ein almenn uppgáva at virka fyri javnstøðu millum kynini. Og her eru menninir eitt vet fleiri í tali.
Føroyingar vóru tó uppaftur meira sannførdir um almenna leiklutin fyri fimm árum síðan. Tá søgdu 70%, at javnstøða millum kynini er ein almenn uppgáva, meðan 20% vóru ósamd í hesum.
Ólavur Ellefsen, formaður í Javnstøðunevndini, fegnast um, at føroyingar taka so væl undir við arbeiðinum hjá Javnstøðunevndini.
- Stóra fólksliga undirtøkan fyri javnstøðu skal ikki undirmetast. Vit koma bara framá, um vit øll lyfta í felag.
At undirtøkan var eitt vet størri í 2011 sær hann sum eina avbjóðing.
- Vit mugu støðugt fylgja við, hvat rørir seg millum fólk og eitt av aðalmálunum hjá okkum er, at javnstøðuarbeiðið verður viðkomandi fyri øll, menn sum kvinnur.
Kanningin hjá Javnstøðunevndini var gjørd í november mánað og er bygd á svar frá 521 fólkum eldri enn 15 ár.
