- Hetta virkar púra óveruligt. Vit skilja ikki, at vit eru mitt í øllum ræðuleikanum, men vit hava tað gott.
Soleiðis segði Laila á Lofti, tá Rás2 fekk orðið á hana beinleiðis úr Mumbai í India.
Hon sigur, at indiskir tíðindamenn sammeta hesa terror atsóknina við tað, sum hendi í New York 11. september 2001, tá tey bæði tvíburatornini, World Trade Center, vórðu álopin við kapraðu flogførum og stutt eftir fullu í grús.
- Hetta hendi seint í gjárkvøldið, um 22-tíðina. Mikael var farin at leggja dóttrina, og eg setti meg at hyggja í sjónvarp. Tá sá eg, at okkurt var hent við Leopold matstovuni, har vit onkuntíð hava etið. Eg fór at vekja Mikael, sum var sovnaður, og so fylgdu vit bæði við í tí, sum hendi, greiðir Laila á Lofti frá.
Tey funnu so út av, at hendingarnar fóru fram í Suðurmumbai.
- Vit búgva í Norðurmumbai, so tað var sum so ikki tætt upp at okkum, men kortini vórðu vit ávarað ímóti at fara út. Eisini fingu vit at vita, at amerikanski skúlin, har børn okkara ganga í skúla, varð stongdur, sigur Laila á Lofti.
Samstundis sóu og merktu tey eisini, hvussu spreingingarnar komu nærri og nærri norður eftur móti býarpartinum, har føroyska húskið býr.
Í hjartanum av býnum
Laila á Lofti sigur, at býurin mest sum er settur í undantaksstøðu.
Tað er heilt undarligt at uppliva ein milliónabý, har ferðslan annars flýtur døgnið runt, vera so friðarligan sum í dag. Umframt fleiri skúlar, so eru eisini fleiri arbeiðspláss stongd í dag, millum annað skrivstovubygningurin, har Mikael arbeiðir, sigur Laila á Lofti.
Føroyingar finnast allastaðni, verður sagt, men Laila á Lofti dugir kortini ikki at siga, um aðrir føroyingar eru í Mumbai í hesum døgum.
Hon greiðir annars frá, at nógv verður tosað í sjónvarpinum um, hvussu hesir terroristarnir eru komnir inn í býin.
- Roknað verður við, at teir eru komnir sjóvegis úr Pakistan og hava siglt mitt inn í Suðurmumbai, har teir so eru farnir í land. Tað svarar til, at teir høvdu siglt inn í Vágsbotn og komið á land har, sigur Laila á Lofti.
Teir tóku so hotell eftir hotell, og sambært tíðindunum noyddu teir hotellgestir at vísa passini, og tey, sum høvdu bretsk ella amerikansk pass, vórðu hildin aftur sum gíslar.
Tamarhald
Serdeildir hjá herinum komu skjótt til býin, og fingu fríað hersettu hotellini, teirra millum Taj Mahal hotellið nærhendir Gateway to India. Sambært Lailu á Lofti er nú bert hin eini bygningurin eftir, sum terroristarnir framvegis hava hertikið, ein ísraelskur bygningur við bæði íbúðum og templi.
- Men herdeildirnar mugu fara varisliga til verka, tí talan kann verða um fellir, sum eru lagdar fyri tær. Teir mugu søkja rúm úr rúmi, og leita við hundum, tí bumbur kunnu vera festar til tey líkini, ið herdeildirnar koma fram á, sigur Laila á Lofti.
Hon sigur víðari, at illgruni er um, at terrosistarnir eru komnir úr Pakistan, og at tað kanna hava samband við, at pakistanski uttanríkismálaráðharrin júst í hesum døgum er í India á vitjan fyri at royna at skapa linna millum londini bæði.
- Pakistanski uttanríkismálaráðharrin hevur í indiskum sjónvarpi úttala seg ógvuliga harðliga móti hesum terrorálopinum og hevur hvassliga fordømt atsóknina, sigur Laila á Lofti við Rás2.
