Tað er ógvuliga gott lag í føroysku hondbóltsleguni í Sveis, har Føroyar í hesum døgum eru við í HM undankapping fyri kvinnur.
Í dag hava Føroyar vunnið 25-21 ímóti Litava, sum undan kappingini varð roknað at vera stórfavorittur ímóti Føroyum.
Hjá føroysku spælarunum og føroyska liðnum ráddi um at reisa seg eftir vónbrotið, sum tað var í gjár at tapa 22-19 ímóti Finnlandi.
Føroyska liðið megnaði setningin væl og virðiliga. Eftir fyrra hálvleik var 15-11, og tá ið síðsta bríkslaði ljóðaði, vísti máltalvan 25-21 til Føroyar.
-Hetta var framúr avrik. Venjarin skifti nógv út, og tað bar við sær, at spælararnir høvdu møguleika at rinda møðina og at føroyska liðið harvið megnaði at halda tørn um leiðsluna, sum tað vann sær í fyrra hálvleiki, sigur Sjúrður Hildarson Hoydal, sum á FM1 fylgir kappingini í Sveis.
Føroyski málverjin Vivian Petersen varð kosin at vera besti føroyski spælarin.
-Tað hevur hon søtliga uppiborið. Um vit skulu standa okkum í sovornum kappingum og dystum, so er tað neyðugt, at málverjin megnar meiri enn tað, sum tað kann roknast við, og tað gjørdi Vivian Petersen ídag, sigur Sjúrður Hildarson Hoydal og leggur aftrat:
-Verjan stóð seg framúr væl, og tað bar við sær, at fyritreytirnar hjá Vivian vóru góðar, og tað takkaði hon fyri.
Í morgin klokkan 14 skulu Føroyar spæla ímóti Sveis.
Føroysku málskjúttarnir: Durita Christophersen Jojic 6, Súna Krossteig Hansen 4, Kristianna Henneberg Joensen 4, Nina Katrina Johansen 4, Bára Krossteig Hansen 2, Turið Arge Samuelsen 2, Pernille Brandenburg 1, Marianna Geirsdóttir Eystberg 1, Bjarta Osberg Johansen 1
