H1N1
Rógvi Nybo
Rogvi@sosialurin.fo
Endaliga tilbúgvingarstigið er nú tikið. Føroyar eru fluttar upp á hægsta stiga á tilbúgvingarstiganum móti farsóttum. Hetta merkir, at vit nú eru komin inn í tað, ið verður kallað »tann Pandemiska fasan«.
- Tað nýggjasta er, at ein ungur persónur er smittaður uttanfyri smittulinjuna, sum var frá flogfarinum, sum lendi í Vágum seinasta týsdag. Hetta merkir at vit hava tvær smittukeldur, segði Bjarni á Steig, virkandi landslækni, við Kringvarpið á middegi í dag.
At vit eru flutt upp á stig 6 merkir hóast alt ikki tær stóru broytingarnar fyri vanliga fólkið.
Nakrar mannagongdir verða tó broyttar í tilbúgvingini.
Ein broyting er, at strangari eftirlit verður við fólki, ið hava verið í tøttum sambandi við persón, serliga í flogfari.
Hevur ein persónur, ið er smittaður við H1N1, verið við flogfari, so eru tey fólk, ið hava sitið í somu røð, tvær rekkjur frammanfyri og tvær rekkjur aftanfyri tilburðin, at rokna sum fólk í tøttum sambandi við tilburðin, og verða sett í viðgerð um sjúkutekin vísa seg.
Eisini skal alt flogtænastufólkið undir viðgerð, og um tað er eitt flogtænastufólk, ið verður sjúkt, so verða øll ferðafólkini at rokna sum at hava verið í tøttum sambandi við influensuna, og skulu helst í viðgerð.
