Í Vági vann AB ein tryggan 5-0 sigur á FC Suðuroy, ið ikki megnaði at andøva ímóti síðsta stóra korterið, tá argjakvinnur fingu fýra av teimum fimm málunum, harav Mona Breckmann skoraði tey trý.
Á ovara vølli í Gundadali í Havn var endurtøka av dystinum um vikuskiftið í Klaksvík, tí enn eina ferð møttust KÍ og B36. Úrslitið gjørdist somuleiðis ein endurtøka, tí eisini hesa ferð eydnaðist KÍ at vinna 2-0.
Samstundis spældu HB og Víkingur á niðara vølli í Gundadali ein dyst, ið gjørdist munandi málríkari, tí har vann Víkingur 6-1 eftir 3-0 í hálvleikinum. Víkingur var enntá á odda 6-0, áðrenn HB-kvinnurnar við 10 spælarum eftir á vøllinum fingu minkað um munin.
Fjórði dysturin var á Svangaskarði, har B68/NSÍ tók ímóti Skála. Her vísti tað seg, at oddaliðið í næstbestu deildini fekk givið góða mótstøðu, men tá avtornaði, vann Skála 1-0 við máli, ið kom miðskeiðis í fyrra hálvleiki.
Lutakastið enn ikki verið til hálvfinalurnar, ið verða spældar soleiðis, at tann fyrra verður hósdagin 2. juni og tann seinna mánadagin 13. juni. Sjálv finalan verður spæld leygardagin 2. juli.
