Lítla Roona Begum er bert 18 mánaðar gomul. Høvur hennara er fleiri ferðir so stórt, sum tað eigur at verða. Trupulleikin er, at barnið líður av tí, sum rópt verður "vatnhøvd" - ella hydrocefalus.
Eftir eitt átak í Noregi at hjálpa familjuni, sum eigur Roona, soleiðis at hon kanska kann fáa viðgerð fyri sína sjúku, vórðu fríggjadagin savnaðar fleiri enn 20.000 krónur inn.
Fleiri altjóða heimasíður hava skrivað um smágentuna, sum ein fátøk familja í indiska býnum Jirania eigur. Familjan hevur sagt, at hon eigur ikki pening til fleiri viðgerðir til gentuna.
Tað er óvist, um til ber at hjálpa indisku gentuni, og sagt verður, at børn við "vatnhøvdi" tørva góða viðgerð, um tey skulu mennast, soleiðis sum tey eiga at mennast.
Vanliga verður hjálpt upp á sjúkuna við at seta inn eitt dren, sum førir heilavætuna úr høvdinum. Slík viðgerð kostar gjarna minni enn 10.000 krónur og er sum so ikki vandamikil, um rætt verður atborið.
Eftir at søgan um smágentuna gjørdist kend, hevur stórur áhugi verið vístur at savna inn pening, so smágentan kann fáa hjálp.
Eitt nú hevur ein privatpersónur í Noregi sett eina innsavning í verk, og her hava fólk longu goldið stívliga 21.000 krónur á konto.
