Tá stórtingsval var í 2009, vóru umleið 15 prosent av norska fólkinum eldri enn 65 ár, men bara trý valevni úr hesum aldursbólkinum komu í tingið. Hevði hesin aldursbólkurin verið umboðaður eftir aldurssamansetingini í fólkatalinum, skuldu minst 25 stórtingslimir verið oman fyri 65. Granskarin Jo Saglie sigur við kringvarpið NRK, at flokkarnir gera ov lítið fyri at fáa tey eldru fram.
-Allir flokkarnir hava ungdómsfelagsskapir, sum eru virknir í uppstillingini, men soleiðis er tað ikki hjá teimum eldru, sigur hann.
Tað finnast eldri fólk, sum hava hug at taka lut í politikki á ovastu rók. Ein teirra er Inge Lønning úr Høgra, sum hevur játtað at stilla upp í heyst, hóast hann hevur fylt 74. Lokalfelagið í Hordalandi hevur tó ikki gjørt av enn, um hann skal upp á listan. Javnaldur hansara, Arne L. Haugen í Arbeiðaraflokkinum, hevur hinvegin boðað frá, at hann fer úr Stórtinginum í heyst.
Í felagsskapinum Seniorsaken harmast tey um, at tey eldru eru so illa umboðað í Stórtinginum, tí tað er tørvur á teimum har, sigur formaðurin, Tore Henning Larsen, við blaðið Vårt Land.
