Nú loyvt er at skjóta lomvigu, álku, lunda og skarv, hava onkrar frásagnir verið á Facebook-síðuni – Fuglaveiða í Føroyum – um veiðidagar. Menn, sum skjóta fugl, nú veiðitíðin er, plaga at vera óførir at kunna um, hvussu dagarnir á báti hildnast í hesi tíðini.
Á síðuni sæst, at tveir mans vóru og skutu skarv leygardagin fyri einari viku síðan. Hetta var her um okkara leiðir, helst í Nólsoyarfirði ella eystan fyri Nólsoynna. Teir fingu seks skarvar. Frásøgn er eisini um menn, sum skutu skarv í Suðuroy og fingu 26 skarvar.
Higartil er lítið frætt um lomvigaveiði og veiði eftir álku og lunda. Loyvt er at skjóta lomvigu, álku, lunda og skarv frá 1. oktober. Tíðin, har loyvt er at skjóta skarv, verður úti 30. november - og síðan er loyvt at skjóta lomvigu, álku og lunda fram til 20. januar í 2019.
