Nógv bendir á, at tað verður 31 ára politiska stjørnuskotið Sebastian Kurz, ið verður næsti kanslarin í Eysturríki, aftaná at val hevur verið í landinum í dag.
Fyribils úrslitini vísa nevniliga, at konservativi flokkurin People's Party, har Sebastian Kurtz hevur verið floksleiðari síðan í mai, verður størstur flokkur til valið, men megnar kortini ikki at vinnan ein reinan meiriluta. Væntað verður tó, at People's Party fer at skipa stjórn saman víðgongda høgraflokkinum Freedom Party. Tað skrivar Reuters tíðindastovan.
Í valstríðnum hevur Sebastian Kurz, ið var uttanríkisráðharri í fráfarandi stjórnini, tosað móti innflyting, og lítil munur hevur verið á hansara flokki og Freedom Party í tí spurninginum. Í kjalarvørrinum av flóttafólkakreppuni í 2015 hevur innflyting nevniliga verið ein stórur partur av valstríðnum, og eydnaðist tað teimum báðum flokkunum, ið ynskja at herða reglarnar fyri innflytarar, at vaksa um atkvøðutalið í mun til tjóðartingsvalið í 2013.
Sambært Reuters, so vísa seinastu tølini, at People's Party fær 31,6 prosent av atkvøðunum, Social Democrats, ið flokkurin hjá sitandi kanslaranum Christian Kern, fær 26,9 prosent og Freedom Party fær 26 prosent av atkvøðunum.
