Eisini arbeiðini uppá teir báðar undirsjóvartunlarnar, Eysturoyartunnilin og Sandoyartunnilin, er nógv ávirka av koronakreppuni, sum herjar allan heimin, og sum eisini hevur lagt stóran part av Føroyum lamnan.
Tað ásannar Teitur Samuelsen, stjóri í felagnum, sum ger tunlarnar.
Tað eru heilt nógvir útlendingar við í arbeiðnum, men nú eru so nógvar forðingar fyri at fáa útlendingar til Føroya, at talið á útlendingum er minkað heilt munandi, sigur stjórin.
Arbeiðið at bora Sandoyartunnilin er munandi skert. Vanliga eru annars fýra vaktir til arbeiðis ísenn, og borað verður dag og nátt. Men nú er alt arbeiðið í Sandoynni lagt stilt og av Gomlurætt verður bara borað við einum sjakki, og um dagin, og tað er alt mannað við føroyingum.
Teitur Samuelsen sigur kortini, at tey hava hampiliga góða tíð, so tað skal ganga heilt illa, eydnast tað ikki at fáa Sandoyartunnilin lidnan til tíðina, ella við ársenda í 2023.
Men tað veldst sjálvsagt um hvussu leingi kreppan varðar, og hvussu sjálvt arbeiðið annars fer at ganga.
Í Eysturoyartunlinum heldur arbeiðið at gera hann lidnan, fram. Men tað er við avmarkaðari ferð, tí tað er ringt at fáa útlendska arbeiðsmegina til Føroyar. Sostatt er talið á útlendingum munandi skert.
Kortini eru útlendingar í Eysturoyartunlinum, men tá ið teir eru her, eru teir í einum slagi av sóttarhaldi og tað eru teir sum eitt slag av familju. Tað merkir, at teir húsast einsamallur í sama skúri og í arbeiðnum hava teir at kalla einki sambandi við onnur, eins og teir heldur ikki hava samband við samfelagið annars.
Teitur Samuelsen sigur, at tey tiltøk, sum eru sett í verk, eru sett í verk í samráð við myndugleikarnar.
Eftir ætlan skuldi Eysturoyartunnilin takast í nýtslu upp undir jól, men stjórin ásannar, at tað fer at knípa.
Tað hevur leingi verið greitt, at tað fer at knípa, og skerjingarnar, sum korona elvir til, ger ikki uppgávuna lættari, sigur Teitur Samuelsen.
Tí sigur hann nú, at tað er mest sannlíkt, at Eysturoyartunnilin verður ikki liðugur fyrr enn tíðliga í næsta árið.
Men Teitur Samuelsen leggur dent á, at koronakreppan er ikki ein hóttan ímóti verkætlanini.
– Tað er kreppan slett ikki, vissar hann um.
