Miðjan mars og eina viku fram sýndi Tónleika- og Dramabreytin í 10. flokki í Fuglafjarðar skúla og
skúlanum á Ziskatrøð fram sangleikin Rok á søgusavninum. Umleið 1850 vitjandi vóru til tær 15
sýningarnar.
Nú er avgjørt at hava tvær eykasýningar hóskvøldið 4. og fríggjakvøldið 5.april, bæði kvøldini kl
19:30. Leikurin verður sýndur í Mentanarhúsinum í Fuglafirði.
Rok á søgusavninum er ein stuttligur og spennandi sangleikur, ið fer fram á søgusavninum í
Mentavík. Fugloyar Páll, ið grundlegði savnið, var ein sannur ævintýrari og savnaði á ferðum sínum
alskyns lutir. Alt frá gimsteinum til klædnapløgg til standmyndir og mangt, mangt annað. Eisini ein
heilt, heilt serliga dýrabaran skatt, sum Páll fjaldi væl og virðiliga onkustaðni á savninum.
Harumframt vísir tað seg, at víðagitna hálsketan hjá Kleopatru, sum Fugloyar Páll fann við
áarbakkarnar á Nilánni, hevur heilt serliga gandamegi: Hon kann vekja deyð til lívs! Og tað er júst tað,
sum hendir. Standmyndirnar verða livandi, og so byrjar ein spennandi og stuttlig skattajakt. Vit hitta
Cesar Augustus og Ceciliu, Kleopatru, Sigmund Brestisson, Trónd í Gøtu, Turid megineinkjuna, Eyður
fyndarríku, Kaptein Svartskegg og hansara sjórænaraharkalið og mong onnur. Alt verður ein sannur
ruðuleiki tá øll - hvør í sínum lagi - royna at finna tann heilt serliga og dýrabara skattin.
Tað eru lærararnir, Bárður á Lakjuni og Marjun Djurhuus, ið hava sangleikin undir hond. Leikurin er
upprunaliga enskur, men er leystliga týddur og lagaður til føroysk viðurskifti. Bárður hevur gjørt orð
og løg til sangirnar og lagt tónleikin til rættis, og Marjun hevur tikið sær av sjónleikinum.
