Europeiski flogferðslustovnurin Easa vil hava, at øll flogfør av slagnum Boeing 737 MAX-9 skulu kannast. Frammanundan hava amerikanskir myndugleikar givið somu boð.
Tað skrivar Reuters.
Orsøkin er, at eitt flogfar av hesum slagi misti eitt vindeyga, stutt eftir at tað var farið á flog í Portland í Oregon í USA fríggjadagin. Flogfarið var í 4800 metra hædd ávegis til Ontario í Kalifornia, tá ið óhappið hendi. Flogfarið, sum fleyg fyri Alaska Airlines, neyðlendi 20 minuttir seinni. 171 fólk vóru umborð á flogfarinum, og eingin teirra fekk skaða av hendingini.
Síðani hava flogferðslumyndugleikarnir í USA givið umleið 170 flogførum av slagnum Boeing 737 MAX-9 forboð fyri at flúgva, til tey eru kannað fyri møgulig teknisk brek.
Sambært Reuters fer europeiski flogferðslustovnurin Easa at krevja, at Boeing flogfør av hesum slagnum, ið flúgva í Europa, verða kannað. Enn er ikki greitt, um flogførini fáa flúgviforboð, til kanningin er gjørd, ella hvussu umfatandi boðini frá Easa fara at verða.
