Diego Costa hevur verið ein umstríddur spælari, síðani hann farna summar skifti til Chelsea frá Atletico Madrid. Undan toppdystinum móti Manchester City í gjár, fekk hann leikbann í tríggjar dystir, fyri at traðka á Emre Can hjá Liverpool í seinnu hálvfinaluni í Liga Cup.
Les eisini: José Mourinho tosar ikki við miðlarnar
Diego Costa, sum hevur brasilskan uppvøkstur, men hevur fingið sær spanskan ríkisborgararætt, er mangan umstríddur, tí hann at kalla altíð endar í hornatøkum við mótsøðuspælararnar. Soleiðis var eisini í dysitnum móti Liverpool.
- Eg kann siga um tað, ið hendi móti Liverpool, at eg kann fara heim og sova væl um náttina. Tí eg havi einki gjørt gali. Eg traðkaði ikki á hann við vilja, sigur Diego Costa í samrøðu við bretskar miðlar.
Les eisini: Sturridge skoraði fyri Liverpool
Eftir dystin tók enska fótbóltssambandið málið upp, og revsaði Diego Costa við leikbanni á tríggjar dystir. Nakað, sum venjarin hjá Chelsea, José Mourinho, er alt annað enn fegin um. Hann hevur ikki tosað við fjølmiðlarnar síðani.
- Eg sigi ikki, at eg eri nakar eingil á vøllinum, men eg geri tað ikki við vilja og tað sær mann eisini á sjónbandaupptøkuni, sigur Diego Costa, sum ásannar, at hann nú má sita uttanfyri við leikbanni.
Chelsea spældi í gjár javnleik 1-1 móti Manchester City. Chelsea er framvegis oddalið í Premier League við fimm stigum.
Premier League 23.umfar:
Í dag:
Arsenal – Aston Villa (13.30)
Southampton – Swansea (16.00)
Í gjár:
Chelsea – Manchester City 1-1
Hull – Newcastle 0-3
Crystal Palace – Everton 0-1
Liverpool – West Ham 2-0
Manchester United – Leicester 3-1
Stoke – QPR 3-1
Sunderland – Burnley 2-0
WBA – Tottenham 0-3
