Enn eitt grannaskiftið í London

Flytingarvindeygað í flestu av stóru londunum í Evropa letur aftur í dag. Í Premier League eru fleiri milliardir krónur brúktar. Flestar av teimum hevur Chelsea brúk við keypi av spælarum sum Mykhaylo Mudryk, Benoît Badiashile, Noni Madueke, Malo Gusto, Andrey Santos, David Datro Fofana, umframt dýra leigu avtalan við João Félix.

Hetta merkir eisini, at tað er trongt í hópinum hjá Chelsea. Arsenal, sum er oddalið í Premier League, hevur leingi leitað eftir einum miðvallara. Fyrstaval er Moises Caicedo hjá Brighton, men hann verður dýrur at keypa leysur.

Tí hevur Arsenal sett eyguni á roynda italska miðvallaran hjá Chelsea, Jorginho. Sky Sports og aðrir bretskir miðlar skriva, at hann kostar Arsenal áleið hundrað milliónir krónur. Jorginho er 31 ára gamal.

Hóast Chelsea og Arsenal eru grannar í London og kappingarneytar, so er hetta ikki fyrstu ferð, at spælarar skifta millum hesi bæði feløgini. Eitt nú kunnu nevnast Pierre-Emerick Aubameyang og Eddie Nketiah, sum báðir spæla í dag.

Kendari skift eru tey hjá Ashley Cole, Petr Čech, Nicolas Anelka, David Luiz, Cesc Fàbregas, Oliver Giroud, Willian og William Gallas.