Nú eru varðhaldið og Kriminalforsorgin í Føroyum løgd saman.
Samstundis hava tey fingið eina felags leiðslu, og tað er Elkin Klettheyggj, sum frammanundan hevur verið leiðari á kriminalforsorgini í eina tíð.
Í Sosialinum hetta vikuskiftið greiðir Elkin Klettheyggj frá, at uppgávan var at skapa eitt enn tættari samstarv og geva brúkaranum eina samanhangandi gongd.
Endmálið við tí er at tíðin í skipanini sama um tað var sum fongslaður ella royndarleyslatin, kundi gagnnýtast sum best.
Elkin Klettheyggj sigur, at í Varðhaldinum eru 12 fangavørðar og har eru 14 pláss í varðhaldinum, men í miðal sita 12 fólk inni.
- Hetta eru bæði fólk sum eru varðhaldsfongslað, fólk sum bíða eftir dómi og fólk sum sita, tí tey hava fingið dóm.
- Av tí at vit einki fongsul hava í Føroyum, men eitt varðhald er tað avmarkað, hvussu langan dóm, fólk kunnu sita í Føroyum, sigur Elkin Klettheyggj.
Av tí sama fara tey, sum skulu sita longur enn 1,5 ár til Danmarkar at sita og í løtuni sita seks fólk í Danmark, sum eru send úr Føroyum.
Men herumframt hevur Kriminalforsorgin eisini eftirlit við fólki, sum antin hava viðgerðardómar, eru royndarleyslatin, hava treytaðar dómar ella eru dømd til samfelagstænastu.
Í løtuni eru eini 50 í eftirliti, og harafturat gera tey persónskanningar, sum eru áleið 70 í tali um árið.
Elkin Klettheyggj vísir á, at leigumálið í Mjørkadali gongur út á sumri í 2018.
- Eftir hetta er óvist, hvar vit skulu vera, men tað hevði verið ynskiligt at fingið eina varandi loysn - og helst eina loysn, sum leggur upp fyri okkara tørvum og avbjóðingum.
Les meiri um viðurskiftini í Sosialinum hetta vikuskiftið.
