Við 37 londum, sum kappast í ársins altjóða Melodi Grand Prix, verða finalistar funnir í tveimum hálvfinalum.
Tann fyrra verður í kvøld í St. Jakobshalle í sveisiska býnum Basel, og her fer fyribils favoritturin hjá veddingarfyritøkunum úr Svøríki á pallin.
Journalisturin Ole Tøpholm, sum hevur viðmerkt Eurovision fyri DR í nógv ár, sigur Svøríki vera eitt tónleikaligt stórveldi.
- Hetta er ikki bara galdandi í Eurovision høpi. Hetta er eisini galdandi fyri tónleikin, sum annars verður framleiddur. Men eg dugi væl at skilja, hví so nógv tosa um Svøríki í ár, tí tey leggja nakað heilt annað fram enn tað, tey plaga at vinna við, sigur grand prix-serfrøðingurin.
Trioin Kaj fer á pallin við saunasanginum "Bara Bada Bastu".
Ole Tøpholm lýsir sangin sum retro.
- Lagið kundi verið við fyri 20-30 árum síðani, og so er tað tann hálvi tónin at enda. Og so finnur tú eisini eitt tema, sum kann skiljast altjóða, sigur hann og heldur fram:
- Og tá tey so hava eina koreografi á leiðini har dansararnir bert ganga við handklæði, so er tað nakað sum kann skiljast frá Finnlandi til Kýpros.
Umframt Svøríki verða Ísland og Norra eisini við í kappingini í ársins fyrru hálvfinalu.
Hetta merkir, at tey ikki kunnu atkvøða í seinnu hálvfinaluni hósdagin, har danska Eurovision-vónin, føroyska Sissal, skal royna at vinna sær pláss í stóru finaluni leygardagin við sanginum "Hallucination".
- Tað hevði verið stuttligt, um vit høvdu Norra, Svøríki og Ísland í okkara hálvfinalu at atkvøtt fyri okkum. Men hálvfinalan í kvøld er framvegis spennandi, tí vit hava okkara bestu vinir við í henni, sigur Ole Tøpholm.
Estland, Ukraina og Albania skulu eisini við í ársins fyrru hálvfinalu.
Tað er ein sterkur vøllur, sigur Carsten Nilsson, sum er medstovnari av fjepparamiðlinum Eurosong.dk, sum skal kappast í sínum 18. Eurovision í ár.
- Tað eru lond, sum uttan nakran trupulleika koma í finaluna, og so eru tað trý ella fýra, sum als ongan møguleika hava, heldur hann.
Sjálvt um kappingin í fyrru hálvfinaluni er sterk, so hevði Sissal faktiskt verið sterkari har enn í hálvfinaluni hósdagin, metir Carsten Nilsson.
- Tað eru næstan ongar kvinnur við í fyrru hálvfinaluni. Hevði Sissal verið í tí, so hevði eg ikki ivast í, at hon hevði komið víðari. Okkara hálvfinala hósdagin kundi ikki verið verri í mun til lutakastið, sigur grand prix-serfrøðingurin.
Seks lond sleppa undan hálvfinalunum á hvørjum ári.
##med2##
Tey eru Italia, Spania, Týskland, Frakland og Bretland, tí tey gjalda størsta partin av Eurovision, og vinnandi landið í fjør fær altíð eitt beinleiðis pláss í finaluni. Hesaferð er tað Sveis.
Fyrra hálvfinalan í Eurovision verður víst í sjónvarpinum hjá Kringvarpinum í kvøld klokkan 20.
/Ritzau/
