Elias og Sävehof vunnu grundspælið - Kjartan sleppur undan beinleiðis niðurflyting

Tað var ein framúr dagur hjá føroyingaliðunum í bestu svensku hondbóltsdeildini í dag.

Elias Ellefsen á Skipagøtu og liðfelagarnir í Sävehof hava vunnið grundspælið í bestu svensku hondbóltsdeildini.

Sävehof vann 29-26 á botnliðnum, IFK Ystad á útivølli. Í steðginum var Sävehof á odda 12-11. Elias skoraði fýra mál fyri Sävehof í dag.

Samstundis tapti einasti kappingarneytin í stríðnum um fyrsta plássið, Kristianstad 26-30 (12-15) fyri Redbergslid á heimavølli. Tað merkir, at Kristianstad kann ikki longur røkka fyrsta plássinum. Sävehof hevur 41 stig, og Kristianstad kann í mesta lagi fáa 39 stig.

Kjartan Johansen gjørdi góðan mun fyri Önnered og skoraði seks mál, tá Önnered á heimavølli vann 31-24 á Aranäs. Í steðginum var Önnered á odda 14-8.

Sigurin merkir, at Önnered hevur 17 stig á fjórðaftasta plássinum, seks stig meira enn IFK Ystad sum er aftast í deildini við 11 stigum. Tað er bara aftasta liðið sum flytur beinleiðis niður í næstbestu deildina. IFK Ystad kann í mesta lagi fáa 13 stig, og tí eru teir í Önnered vísir í at sleppa undan beinleiðis niðurflyting. Kjartan og liðfelagarnir skulu sum støðan er nú spæla upp- og niðurflytingardystir móti einum liði úr næstbestu deildini. 

Týskvøldið spælir Sävehof næstseinasta dystin í grundspælinum á útivølli móti Alingsås.

23. mars verður seinasta umfarið í grundspælinum. Tá skal Kjartan saman við hinum í Önnered royna seg móti Andreas Palicka og hinum hjá Redbergslid.

Sama dag er toppuppgerð í Partille millum Sävehof og Kristianstad. 

STØÐAN: