Handverkarar vóru í ferð við at skifta tak og brendu tjørupapp á nýggja tróðrið, tá eldur kom í millum skins og hold.
Sløkkiliðið varð boðsent, men tað gekst heldur trupult at basa eldinum, sum breiddi seg undir nýggja tróðrinum.
Talan er um gomul hús, sum Anton Degn, skjalavørður í sínari tíð átti. Húsini hava havt flagtekju, og tískil vórðu tey takt við nævur, sum fyrr varð nýtt undir flagnum.
Eldurin festi í nævrarnar, og tí var hann heldur trupul at basa, sigur Petur Seloy, sløkkiliðsmeistari.
Vakthavandi á politistøðini í Havn sigur, at húsini fingu kortini ikki stóran skaði, hóast partur av tróðrinum fórst. Nakað av vatn- og roykskaða var eisini.
Petur Seloy sigur, at teir nýliga hava fingið framkomna útgerð, sum teir í hesum føri settu inn í íbúðina til tess at taka sum mest av roykluktinum.
