Bæði landsstýriskvinnan í almannamálum og forkvinnan í Trivnaðarnevndini hjá løgtinginum vera við, tá støðan í eldrarøktini verður viðgjørd á almennum fundi í Miðvági í kvøld.
Støðan innan eldraøkið hevur verið á breddanum síðani umfatandi sparitiltøk vóru fráboðað í vár. Burtur úr tí spretti felagsskapurin Eldramálið, hvørs endamál er at varpa ljós á viðurskiftini hjá okkara eldru borgarum, ið hava tørv á hjálp frá samfelagnum, umframt avvarandi teirra.
Fundurin í kvøld fer at viðgera rættindi og minsta krav í samband við røkt. Eisini verður komið inn á viðurskiftini hjá starvsfólkunum, sum starvast í heimarøktini.
Skráin fyri fundin, sum verður í bygdarhúsinum í Miðvági klokkan 19 í kvøld, er hendan:
- Óluva Vilhelmsen, sjúkrarøktarfrøðingur: Rættindi og minsta krav í sambandi við røkt
- Starvsfólk í heimarøktini: Tí flýggja starvsfólk úr heimarøktini
- Avvarðandi hjá heimarøktsbrúkara: Um heimarøktin virkaði, so hevði ”Sum longst í egnum heimi” verið veruleiki
- Halldis Joensen, forkvinna í Alzheimersfelagnum: Normeringar í sambandi við demens
- Rósa Samluelsen, forkvinna í Trivnaðarnevnd løgtingsins: Kanning gjørd í Vágum ”Ynski hjá eldri í samband við ellisárini”
- Kjak
- Annika Olsen, landsstýriskvinna í almannamálum, tekur saman um.
