Tá ið mett verður um dálking frá bilum, er ikki nóg mikið einans at hugsa um sjálvan bilin og tað tíðina, hann verður brúktur
Tað sigur Theresa Jákupsdóttir, M.Sc. í umhvørvisvísindum.
Hon heldur, at tað er eitt áhugavert kríggj, sum er brostið á ímillum oljuveitarar og veitarar av eltøkni.
- Kríggið snýr seg um pengar, um marknaðin fyri húsaupphiting og um flutning, nú SEV og samgongan hava sett sum mál, at øll elorka á landi í ár 2030 skal vera grøn.
Men hon heldur, at spurningurin er, hvussu lagt verður upp fyri umhvørvinum, nú heimurin er raktur av veðurlagsbroytingum, og lond skulu tillaga seg stórar broytingar.
- Ein grøn kós er kærkomin, men tað er avgerandi, hvør tað er, sum setir kósina.
Hon sigur, at er talan um áhugamál, sum einki hava við umhvørvi og náttúru at gera, er skjótt at vikið kann verða frá grønu kósini.
Theresa Jákupsdóttir vísir á, at stjórin á Magn hevur lagt Umhvørvisstovuna undir at gera partískar metingar av ávísari tøkni, og kalla hana grøna.
- Stjórin á Magn hevur rætt í, at el-bilar ikki eru grønari enn verandi bilar. Enn er nakað eftir á mál áðrenn streymframleiðslan í Føroyum kann kallast grøn.
- Men sjálvt um allir bilar í Føroyum koyrdu við grønari elorku, er stóri innflutningurin av bilum prógv um, at Føroyar hava eina stóra útistandandi CO2 skuld.
- Tá ið mett verður um dálking frá bilum, er ikki nóg mikið einans at taka støði í brúksskeiðnum. Heldur skal vera hugsað í einum samanhangi, og ein máti at gera hetta uppá, er at hyggja eftir allari lívsringrásini hjá bilinum. Men harumframt er eigur at verða hugt eftir øllum kervinum rundan um bilin, so sum vegagerð og farmaflutningi.
- Tað snýr seg ikki bert um eitt umskifti frá olju til el. Tað er als ikki nóg mikið. Tí er tað óheppið, um kjakið um veðurlagsbroytingar verður avmarkað til at snúgva seg um, hvat slag av bili fólk skulu brúka.
- Hetta hevur ongan týdning, tí tað, sum hevur týdning, er, at samfelagið verður tillagað eftir nógv færri bilum tilsamans.
- Hetta merkir sjálvsagt broytingar í lívshátti, tí í Føroyum er tað vorðið so, at bilasølan í fleiri ár á rað hevur sett nýtt met, sigur hon.
Les meiri um hennara sjónarmið við at trýsta HER
