Eitt pláss ger mun

Munurin á nummar 113 og 114 er risa stórur. Ítróttarliga og ikki minst fíggjarliga kann tað fáa ovur­honds stóran týdning.
Tá FIFA fer at gera av, hvussu lið­ini í komandi HM-undankapping skulu spæla, verður styrkislistin fyri juli­mánað brúktur sum út­gangs­støði. Hvørki Føroyar ella Wales spæla í juli, Liktinstein, sum ikki er langt aftanfyri okkum, spælir ikki fyrr enn í august og hini evropeisku liðini aftanfyri Føroyar og Wales, hava ikki møguleika at vinna seg upp um okkum, hóast tey avtala ein venjingardyst í juli. Tí verður lítil og eingin broyting á listanum fyri juli, sum so aftur hevur við sær, at vit longu nú vita, hvussu liðini verða styrkismett næstu ferð.
Listin fyri junimánað gevur Før­oyum og Wales eins nógv stig og somu plasering, nummar 114, men FIFA velur at seta Wales omanfyri á listanum. Brúka vit sama lista og einans hyggja at evropeisku lond­unum, hevur FIFA sett Wales sum nummar 46 og Føroyar 45. Munurin á hesum báðum tølunum, er sera stórur.
Munurin millum 45 og 46 er mun­urin millum styrkisbólk 5 og styrkis­bólk 6. Tað er nevniliga so­leiðis, at átta tey veikastu evro­peisku liðini verða koyrd í ein og sama pott, styrkisbólk 6, tá lut­ur skal kastast um, hvussu skal spælast til komandi HM-undan­kapp­ing. Liðið omanfyri tey kemur í styrkisbólk 5 og tað merkir, at tað liðið eisini kemur at spæla í móti lið­um, sum eru styrkismett veikari. Føroyar høvdu sostatt møtt liðum sum Malta, San Marino, Andorra og Luksem­burg.
Við hesum mótstøðuliðum, hevði møguleikin fyri at vinna vaksið munandi. Hetta hevði aftur bøtt um umdømið hjá føroyskum fótbólti uttan í heimi, fleiri áskoðarar høvdu komið til dystirnar og føroyska fót­bóltslandsliðið hevði eisini verið meiri áhugavert hjá stuðlum. Virgar Hvidbro, aðalskrivari hjá Fót­bóltssambandinum, sær nógvar fyrimunir í hesum.
– Virðingin fyri okkara landsliðið hevði beinanvegin vaksið. Tað hevði verið lættari at fingið venj­ingar­dystir. Fíggjarliga hevði tað sjálv­andi havt stóran týdning eisini, og fleiri áskoðarar høvdu ivaleyst eis­ini komið til dystirnar, har vit hava ein góðan møguleika at vinna, metir Virgar Hvidbro.
Tí letur Fótbóltssambandið tað ikki fara aftur við borðinum, at Wales – tilvitað ella ikki – liggur oman­fyri á styrkislistanum, hóast út­rokningar hjá øðrum parti siga nak­að annað, sum tað verður greitt frá aðra­staðni á hesum síðum.