Alt teknar seg væl til bátastevnuna, sum verður í Vestmanna í næstu viku.
Stevnan byrjar longu hósdagin, 26. mai, sum er Kristi Himmalferðardagur, og hæddarpunktið verður leygardagin, 28. mai, tá bátasiglingin verður, og skráin er pakkað við tiltøkum, bæði til børn og vaksin.
Her eru bestu umstøður til bæði bátar og kampingvognar, og her eru sera góðar tjaldumstøður við nógvum plássi til ymisku tiltøkini.
Undirtøkan fyri bátastevnuni hesaferð er sera góð, og tilmeldingarnar streyma inn, bæði til bátapláss og kampingpláss.
Jónfinn Egilsnes, sum er ein av fyriskiparunum, sigur, at pláss er fyri umleið 110 til 120 gestabátum, nú teir hava fingið nakrar brúgvar aftrat. Kampingplássini eru eini 90 í tali, og bæði bátar og vognar hava atgongd til vatn og el.
Hann sigur, at hóast øll plássini til bátar og vognar skjótt eru fullteknað, eru øll sjálvsagt vælkomin á bátastevnu í Vestmanna.
Jónfinn Egilsnes sigur, at undirtøkan er ógvuliga stór, og hann væntar, at tað verða fleiri túsund fólk, sum fara at leita sær til Vestmanna frá og við hósdegnum.
- Vit vænta eitt rættiliga stórt tal av bátum til siglingina av Fútakletti og á Vestmanna, tí umframt teir umleið 110 til 120 gestabátarnar, sum vit vænta til bygdar, eru tað altíð nakrir aðrir bátar, ið hava sína føstu legu aðrastaðni, sum eisini koma við til siglingina.
Jónfinn Egilsnes sigur, at hann verður ikki skakkur, um einir 170 til 200 bátar verða við í siglingini næsta leygardag.
- Vit hava bjóðað teimum, sum koma við báti ella kampingvogni, at koma upp á pláss í Vestmanna longu týsdagin í næstu viku. Alt eftir, hvussu líkindini eru og verða í vikuni, er tað gott hjá teimum, sum ætla sær higar, at hava nakrar dagar at velja ímillum, tá siglast ella koyrast skal, sigur hann.
Skráin fyri bátastevnuna hesaferð er helst størri og fjølbroyttari enn nakrantíð áður.
##med2##
