Hetta við ov stuttum svimjihylum á Oyggjaleikum er ikki nakað nýtt. Á Rhodos í 2007 var svimjihylurin nógvar sentimetrar ov stuttur, men tá var ikki ætlanin, at slíkt skuldi endurtaka seg. Tí kom føroysku svimjarunum dátt við, at kappingarhylurin á Isle of Wight er ov stuttur – hóast talan bara er um millimetrar.
At hylurin tí ikki lýkur altjóða FINA-krøv, kemur illa við hjá bæði Svimjisambandinum og føroysku svimjarunum, tí svimjararnir ganga ikki bara høgt uppí at vinna heiðursmerki, men satsa eisini nógv upp á sjálvar tíðirnar, sum á Oyggjaleikunum ofta eru bæði persónlig og føroysk met og kunnu brúkast sum tilmeldingartíðir til eitt nú EM- og HM-kappingar.
– At talan aftur hesa ferð er um ein ov stuttan kappingarhyl, hava vit hvørki fingið nakað at vitað um frá Svimjisambandinum ella oyggjaleikafelagsskapinum, IGA, sigur forsetin í ÍSF, Petur Elias Petersen, sum viðgongur, at hann gjørdist skakkur, tá hann frætti um ov stutta hylin á Isle of Wight.
– Har er neyvan nógv at gera, tí bara ein hylur er á Isle of Wight, ið kann brúkast til slíkar kappingar, men allíkavæl kann tað tykjast løgið, at IGA hevur góðkent hetta. Vit í ÍSF hava stjórnarfund í annaðkvøld, og tá ætli eg mær at fáa meira at vita um málið frá Svimjisambandinum.
