Hetta politiska atgerðarloysi hevur ta beinleiðis avleiðing, at lívsgrundarlagið hjá privatu fjølmiðlunum er hótt. Men fyri at kyrra privatu miðlarnar, ætlaði landsstýriskvinnan at »seta eina kommisión«.
Nú ein tíð er fráliðin, hevur Sosialurin biðið um innlit í arbeiðið við hesi kommisión - og tær ætlanirnar, sum landsstýriskvinnan hevur. Men her var lítið at heinta. Í innlitssvarinum sigur Mentamálaráðið, at ráðið hevur í eina tíð arbeitt innanhýsis við hesi ætlan, men at enn er kommisiónin ikki sett, og at Mentamálaráðið tískil einki tilfar hevur at útflýggja.
Halló Helena Dam á Neystabø! Ikki ein stavur er skrivaður í málinum um hesa kommisiónina. Tú hevur breiðkað skattagrundarlagið undir kringvarpinum samstundis sum tú tryggjar Kringvarpinum, at tað kann fara í eina beinharða hamrandi órættvísa kapping á lýsingarmarknaðinum við 80 milliónum almennum skattakrónum í rygginum fyri at jarðleggja privatu miðlarnar í Føroyum. Hvat hugsar tú fyri tær? Ætlar tú at tjóðartaka privatu miðlarnar í Føroyum?
Slíkur politikkur er ómentaður og sera ódemokratiskur!
