Veðrið hevur tarnað flogferðsluni so nógv í dag, at einki flogfar er komið í Vágar í dag.
Seinkingar vóru í gjár, og aftur í dag hevur veðrið argað so nógv at einki flogfar er komið í Vágar ella farið úr Vágum í dag.
Enn eru vónirnar tó ikki heilt burtur, og tí verður roynt aftur í kvøld.
Millum annað skal flogfarið úr Keypmannahavn - RC451 - koma um sekstíðina í kvøld, og ætlanin er eisini, at flogfarið úr Billund skal royna aftur seinnapartin, skrivar felagið.
Eisini ætlar felagið at fáa flogfarið úr London heim í kvøld, skrivar felagið í tíðindaskrivinum. Um so er, at flogførini lenda í kvøld, verður flogið til Bergen, Keypmannahavnar og Billund millum klokkan 19 og 20 í kvøld.
Seinkingarnar í gjár og í dag hava við sær, at tey flogførini, sum eftir upprunaligu ætlanini skuldu koma í dag eisini eru seinkað. Tað hevur millum annað við sær, at flogfarið úr Keypmannahavn - RC455 - er flutt til klokkan 01.00 í nátt. Har skulu ferðafólk tjekka inn áðrenn klokkan 23 í kvøld danska tíð.
Triðja flogfarið úr Keypmannahavn, tað er tað sum eitur RC457, er avlýst og ferðafólkini eru umbókað til RC 455 í nátt og RC 451 mikumorgunin. Her kunnu ferðafólk kanna teirra bókingar á www.checkmytrip.com fyri at síggja, hvørjum flogfari tey nú skulu heim við.
Ferðafólkini, sum skuldu til Keypmannahavnar við RC456 klokkan 16 í dag, sleppa í fyrsta lagi avstað eftir midnátt. Tí heitur Atlantic Airways á ferðafólk um ikki at koma á flogvøllin fyrr enn í fyrsta lagi tveir tímar áðrenn fráfaringartíð.
Annars verður eisini heitt á ferðafólkini um at fylgja við á heimasíðuni hjá felagnum: www.atlantic.fo.
