Neyð
Miseydnað grøði og áhaldandi álop frá grashoppum hava gjørt, at umleið 3,5 milliónir fólk í vesturafrikanska landinum Niger svølta. Hjálparfelagsskapir siga, at 40 prosent av allari grøði er farin fyri skeyti, og teir vænta, at fleiri hundraðtúsund fólk fara at doyggja í hungri, fáa tey ikki hjálp sum skjótast.
-Tað er einki minni enn ein vanlukka, at altjóða samfelagið ikki ger nakað fyri at hjálpa hesum partinum av Afrika, sigur Jan Egeland, sum er varaðalskrivari í ST. .
-Fyri einum mánað síðani bað ST um 100 milliónir krónur til at hjálpa teimum svøltandi í Niger við, men enn hava vit bara fingið 20 milliónir, og tað er ein vónbrot, sigur Jan Egeland við Aftenposten.
Børn doyggja
Viðurskiftini í Niger eru sera trupul, og landið er næstan altíð í neyð. Tað turra veðurlagið egnar seg sera illa til landbúnað. Tann einasta týðandi útflutningsvøran, sum landið hevur, er uran, men prísurin á urani er fallin tey seinastu árini. Á einum altjóða yvirliti yvir livikorini í heimsins londum er Niger nummar 173 og næstniðast. Bara í Sierra Leone eru livikorini verri enn í Niger.
Í næstu viku hittast leiðararnir í heimsins ríkastu londum á Gleneagles-hotellinum í Skotlandi at umrøða ymsar spueningar, og ímillum evnini er fátækradømið í Afrika. Og har er nóg mikið at tosa um. Bara í Niger fáa 350.000 børn ov lítið at eta ella ov vánaligan mat, og í høvuðsstaðarumráðnum doyggja fleiri børn um dagin.
-Børn doyggja í hungri, men trupulleikin er, at eingin leggur nakað í tað, sigur Johanne Sekkenes, sum stendur á odda fyri arbeiðinum hjá felagsskapinum Læknar uttan Landamark í Niger.
