- Stóra takk fyri. Ja, nú eri eg ikki so nógv fyrireikaður til hetta, má eg viðganga. Men tað er deiligt at fáa ein prís fyri tað arbeiðið, sum vit hava gjørt í eitt umleið eitt ár, og ein góð fløga er komin burturúr, halda vit sjálvi. So vit eru nøgd. 1000 takk fyri.
So stuttur og greiður var talsmaðurin fyri Hamferð, tá planetin varð latin teimum mikukvøldið.
- Tað var næstan óbehagiligt at standa har uppi, tí eingin av okkum visti, hvat vit skuldu siga. Tað var bara rein improvisatión. Vit høvdu faktiskt væntað, at Grandmas Basement fóru at vinna hetta, sigur Theodor.
Uttanlands at spæla
Stillføri er tó ikki júst tað, bólkurin er kendur fyri. Við teirra framførslum og innspælingum hava tey sligið eitt slag fyri doom-metal tónleikinum her á landi. Tey hava gjørt vart við seg á føroyskum hittlistum, á G! (har tey fingu fantastisk ummæli í útlendskum tónleikabløðum), á Summarfestivalinum og á Ólavsøkukonsertini. Harumframt kom fyrtsa fløgan, nevnd: "Vilst er síðsta fet", út í desember.
Theodor heldur, at planetin kemur væl við.
- Vit ætla at fara at leita okkum uttanlands at spæla nú, so hetta sær bara heilt pent út á cv'num, heldur hann.
Við í bólkinum eru: Jón Hansen, John Egholm, Esmar Joensen, Theodor Kapnas, Tinna Tótudóttir og Remi Johannesen
