Í staðin fyri at brúka nógvan pening uppá at senda fólk av landinum til uppvenjingar, skulu rørslutarnað fáa fleiri tilboð um venjing og uppvenjing í Føroyum.
Hetta kemur fram í einum svari frá Helenu Dam á Neystabø, landsstýriskvinnu, uppá fyrispurning frá Rúnu Sivertsen um venjingartilboð til rørslutarnað.
Rúna Sivertsen vildi hava at vita, um nøkur ætlan er um at gera eina skipan, sum tryggjar teimum rørslutarnaðu neyðuga vegleiðing og venjing í Føroyum. Møguleikarnir í Føroyum í dag eru ikki góðir, og stórur tørvur er á betri tilboðum. Betri venjingartilboð høvdu eisini minkað um tørvin á stuðulsfólki, koyristólum og skurðviðgerðum, vísti Rúna Sivertsen á í sínum viðmerkingum.
Í dag verða nógv fólk send av landinum til uppvenjingar, tí tey ikki kunnu fáa hesa viðgerðinga heima í Føroyum. Hetta kostar nógvan pening, og hesin peningurin hevði verið betri nýttur í Føroyum, heldur tingkvinnan hjá Fólkaflokkinum.
Royndarskipan við økisterapi
Eftir svarinum at døma, er ein glotti at hóma hjá hesum fólkunum. Ein millión krónur eru settar av á fíggjarlógini til eina royndarskipan við økisterapi, og ætlanin er at seta hesa skipanina í verk um stutta tíð. Ætlanin er, at økisterapi skal vera á tveimum støðum í landinum, men enn er ikki greitt, hvar hetta verður. Fólk, sum ikki hava tørv á tungari og truplari viðgerð kunnu so fáa regluliga venjing úti í økisterapiini.
Tann meira intensiva viðgerðin skal framvegis fara fram á sjúkrahúsunum og í nøkrum førum uttan fyri landoddarnar, har góð tilboð eru.
Ein arbeiðsbólkur er eisini settur at lýsa tørvin á viðgerð, eftirviðgerð og venjing í Føroyum, og hann verður væntandi liðugur við sítt arbeiði hesa vikuna. Hesin arbeiðsbólkurin hevur mælt til at gera eina royndarskipan við økisterapi í tveimum støðum í Føroyum og at arbeiða við at gera eina meira samskipaða intensiva viðgerð eftirfylgjandi.
Arbeiðsbólkurin skal lýsa, hvussu nógvir føroyingar hava eitt ella annað rørslubrek í dag og meta um, hvussu stórt talið verður um nøkur ár, og hvussu aldursbýtið verður. Bólkurin skal lýsa, hvussu vit í Føroyum nøkta tørvin á viðgerð á besta og mest skynsama hátt, og hann skal somuleiðis lýsa, hvussu almanna-, heilsu- og skúlaverkið kunnu samstarva um at loysa tørvin. Í hesum sambandi skal havast í huga, at fíggjarliga orkan er avmarkað.
Helena Dam á Neystabø sigur í svarinum, at tað er rætt, at samskipaði tilboð í Føroyum til øll rørslutarnað kundu spart tí almenna pening. Men hetta hendir ikki eftir einum degi.
- Tað er neyðugt at brúka orku til at seta dyggar skipanir á stovn, og tað skerst ikki burtur, at sparingarnar koma ikki innan eitt stutt áramál. Tær koma í einum longri tíðarhøpi, vísir hon á.
