Tað gongur støðugt og stútt eftir hæli hjá Eik Banka. Virðið á partabrævinum hjá Eik Banka á danska virðisbrævamarknaðinum hevur stútt og støðugt gingið niðureftir seinasta hálvt triðja árið, og er í dag minni enn ein tíggjundapart vert av tí, tað var vert, tá best stóð til.
Eik Partabrævið stóð á 775 krónum fyri partabrævið, tá tað toppaði. Í dag verður tað selt fyri 75,50 krónur fyri partabrævið, og eitt skifti í dag var tað heilt niðri á 73,50 fyri partabrævið.
Eftir at hava ligið lágt í summarferiuni í fjør, vaks partabrævið brádliga í virði um hálvan agust seinasta, og fór fyri 130 krónur partabrævið tann 26 august. Síðani hevur tað aftur gingið niðureftir, og er partabrævið nú á tí lægsta nakrantíð.
Eik Banki hevur aðalfund um 12 dagar, har nevndin skal greiða frá um virki hjá Eik í farna árinum og har avgerð um rindan av halli sambært góðkendu ársfrásøgnini verða á skránni millum annað.
