Tað sigur AB miðvallarin, Sorin Anghel, sum hevur fingið fýra pentur yvir vinstra eygað, eftir at hann brast saman við Tór-Ingari Akselsen í dysti móti 07 Vestur í gjár. AB vann 2-0.
Tað var stutt fyri hálvleik, at Sorin Anghel og Tór-Ingar Akselsen fóru upp at stúta. Tíverri fyri teir báðar, so brustu høvdini saman og báðir lógu eftir á.
Sorin Anghel fekk fyrst binding um høvdið og ætlaði at spæla víðari. Hann kom á vøllin, men var biðin um at fara av aftur vøllinum tí hann hevði blóð á troyggjuni. Tað vóru bara tveir minuttir til hálvleiks, men venjarin hjá AB valdi at skifta hann út alíkavæl.
- Eg fekk at vita, at vit høvdu einki eyka sett av klæðum. Tí tók eg avgerð um at skifta hann út, sigur Sámal Erik Hentze, venjari hjá AB.
Sorin Anghel fór á sjúkrahúsið og bleiv seymaður yvir vinstra eygað. Tað bleiv til fýra pentur. Í so máta vann hann 4-2 á Tór-Ingari, sum fekk tvær. Hinvegin, so slapp Tór-Ingar at spæla restina av dystinum.
- Eg havi ilt, men spæli aftur næsta dyst, sigur Sorin Anghel.
AB hevur vunnið seks av teimum seinastu sjey dystunum í landskappingini og er formsterkasta liðið yvir sjey tey seinastu umførini. Argjamenn hava fingið 19 av 21 møguligum stigum hetta tíðarskeiðið og liggja nú nummar sjey, eftir at hava verið botnlið fyrsta triðingin.
