Hóskvøldið 24. november verður forvitnisligur fyrilestur á Viðareiði. Tá fer nýklakti rithøvundurin, Kitty May Ellefsen, at halda fyrilestur á Viðareiði um nýggju bókina og eitt lív, har hon var bundin at rúsdrekka.
Hon fer at greiða frá lívi sínum, og hvussu henda misnýtslan setti sín dám á gerandisdagin. Hetta hevur hon eisini skrivað um í nýggju bók síni "Frá reyðvíni til marathon".
- Hetta er ein persónlig søga um tað at missa fótafestið í lívinum og at finna tað aftur fyri síðani at fáa eitt betri lív, sigur Kitty May, sum gleðir seg at koma til Viðareiðis at siga frá.
Tiltakið byrjar klokkan 19.30 og verður í skúlanum á Viðareiði. Høvið verður eisini at seta Kitty May Ellefsen spurningar, eins og høvi verður at keypa bókina eftir fyrilesturin.
Eftir fyrilesturin, sum varar í ein góðan tíma, verður ein drekkamunnur at fáa.
