Hann er kendur sum kokkurin, ið gongur egnar og nýggjar leiðir, og torir at skapa nýggjar rættir við føroyskum rávørum. Summi hálova hansara kreativu evnum, meðan onnur halda, at tað als ikki er matur, hann ger.
- Tað kemur fyri, at onkur sigur við meg, at tað, sum eg geri, er nakað fjas, sigur Leif Sørensen, høvuðskokkur á gourmetmatstovuni Koks á Hotel Føroyum.
Men heimsins bestu kokkar og nakrar av teimum kendastu matjournalistunum eru als ikki í iva um at tað, sum Leif ger, er heilt serstakt og týdningarmikið. Ein av mongu matjournalistunum, ið hevur stóra virðing fyri rættunum, ið Leif skapar, er Bent Christensen. Hann hevur í mong ár verið redaktørur fyri Den Danske Spiseguide, sum hvørt ár fortelur um bestu matstøðini í danska ríkinum.
Nú hevur hann skrivað eina bók á næstan 300 síður um Leif Sørensen og teir rættirnar, sum hann gandar fram úr føroyskum rávørum.
Bókin er ein viðurkenning
At ein bók er skrivað um Leif Sørensen og hansara kokkakynstur er nakað, sum høvuðspersónurin sjálvur fegnast um.
- Hetta er so at siga ein dokumentatión upp á tað, eg geri dagliga, og tað eri eg glaður fyri. Eg eri serliga fegin um myndirnar, sum eru í bókini, tí tær siga meir enn alt annað. Myndir lúgva ikki, sigur Leif Sørensen. Hann sær bókaútgávuna sum ein stóran heiður, tí sjálvur hevur hann stóra virðing fyri rithøvundanum og myndamanninum.
- Hetta eru tveir menn, sum hava gjørt bøkur um heimsins bestu matstøð, og øll innan mína vinnu vita, hvørjir teir eru. Bent Christensen er ein maður, sum hevur etið á teimum allarbestu matstovunum, so tað, at hann heldur meg og mína matger vera áhugaverda, er stórt. Eg kundi neyvan fingið eina betri viðurkenning enn hesa, sigur Leif Sørensen.
Tað var tó ikki ætlanin av fyrstan tíð at skriva eina bók um Leif Sørensen og matin á Koks.
- Teir vóru í ferð við at skriva eina bók um fleiri skandinaviskar matstovur, men tað bleiv av ongum, fortelur Leif Sørensen og heldur fram:
- Teir spurdu so okkum, um teir ikki kundu gera eina bók um Koks. Hetta er ein fantastiskur máti at vísa bæði føroyingum, útlendingum, matjournalistum og kokkum, hvussu vit á Koks hava valt at brúka føroysku rávørurnar, sigur Leif Sørensen.
Vil altíð vera betri
Hóast matjournalistur og onnur serkøn innan gourmet geva Leif Sørensen góð skoðsmál, missir hann ikki fótafestið ella tekur sær av løttum.
- Eg eri rættiliga harður við meg sjálvan, og í roynd og veru eri eg ongantíð hundrað prosent nøgdur við tað, eg geri. Eg veit, at eg kann gera tað betri, sigur Leif Sørensen, sum hevur fingið útbúgving og arbeiðsroyndir frá nøkrum av teimum bestu í Danmark, so sum Kommandenten hjá Francis Cardenau og Brian Funder á Marie Grubbe á Tjele Gods. Lítillátin greiðir hann frá, at hann gjøgnum árini hevur fingið bjóðað størv á nøkrum av teimum bestu matstovunum í Norðurlondum, men altíð hevur takkað nei til hesi tilboðini.
- Tá eg fór niður til Danmarkar at læra, visti eg altíð, at eg skuldi aftur til Føroya, tí eg vildi broyta matmentanina í Føroyum og royna at eksperimentera við rávørunum. Enn tann dag í dag kundi eg ikki hugsað mær at arbeitt aðrastaðni, fortelur Leif Sørensen.
Ein av orsøkunum til at hann fór undir at fáast við gourmetrættir er ein uppliving hann hevði í Danmark.
- Eg fór út á eitt fínt matstað, har eg fekk eina fantastiska heildaruppliving. Alt gekk upp í eina hægri eind, frá tí eg trein inn um dyrnar, til eg fór út aftur. Frá tí løtu visti eg, at hetta slagið av uppliving var nakað, eg eisini vildi bjóða øðrum fólkum – og føroyingum, greiðir Leif Sørensen frá.
Føroyingar tora betur og betur
Eitt er at útlendskir matjournalistar og kokkar hálova forkunnugu rættunum, sum Leif Sørensen ger, men misjavnt er, hvat føroyingar halda um eitt nú ræst kjøt, garnatálg, turran fisk, tá tað er latið í nýggjan ham og serverað við annarleiðis samansetingum.
- Tað eru onkrar mýtur um gourmetmat, sum framvegis liva væl í okkara landi. Fólk eru bangin fyri, at tað er ov dýrt, tey blíva ikki mett, tey halda seg ikki vita, hvussu tey skulu bera seg at á eini fínari matstovu og so framvegis, sigur Leif Sørensen, sum samstundis vísir á, at lítið hald er í hesum pástandunum, ið summir føroyingar hava um fine dining, sum hann sjálvur kallar tað.
- Í flestu førum er tað soleiðis, at tá tey hava roynt gourmetmat, gerast tey positivt ovfarin og koma síðani aftur. Tey finna útav, at tað er ikki neyðturviliga dýrari at eta gourmet, enn tað er at eta á eini meira vanligari matstovu í býnum. Og so síggja tey eisini máltíðirnar sum eina heildaruppliving, sigur Leif Sørensen. Sambært gourmetkokkinum eru føroyingar farnir at tora betur at royna nýggjar og annarleiðis rættir.
- Fyri nøkrum árum síðani var tað óhugsandi at borðreiða ein høvuðsrætt uttan epli og uttan sós. Soleiðis er ikki í dag. Fleiri og fleiri fólkum dámar at royna nýggjar rættir, eisini teir føroysku, har samansetingin er ein onnur enn tann, tey eru von við.
Kendari í útheimi
Hóast rákið í Føroyum innan gastronomi er broytt nakað seinastu árini, dylir Leif Sørensen ikki, at tað er tungt at reka eina gourmematstovu. Orsøkirnar eru fleiri.
- Tað er upp á ongan máta lætt at reka eitt matstað í Føroyum, sum borðreiðir tann matin, vit gera á Koks. Ynskiligt hevði verið, um politiska skipanin var ein viðspælari, men sum støðan er, ger hon tað upp á ongan máta lættari, sigur Leif Sørensen og leggur afturat:
- Í øðrum londum hevur mann til dømis hjálpt hesi vinnuni soleiðis, at MVG á mati er sett niður. Øll hesi londini blóma veruliga, greiðir Leif Sørensen frá.
Hann heldur tað vera spell, at rættir hansara úr føroyskum rávørum eru kendari úti í heimi enn í Føroyum.
- Ein partur av føroyingum dugir ikki at síggja, at matur kann vera annarleiðis og geva eina serliga uppliving. Tað haldi eg, er ein rættiliga trongdskygd hugsan. Útlendingar hava langt síðani sæð dygdirnar í føroysku rávørunum, og vit vita, at fleiri matáhugað ferðafólk, hava hug til at ferðast higar, bert fyri at fáa eina gastronomiska uppliving. Sum nú er, eru vit kendari í útheimi enn í Føroyum, og tað er harmuligt.
Góðskan er framúr
Tað, sum eyðkennir rávørurnar í Føroyum, og sum ger matin til nakað heilt serstakt, er góðskan. Sambært Leif Sørensen er tað júst hetta, sum fær føroyska gourmetmat á eitt høgt støði.
- Útlendingarnir, ið koma her, eru púra ovfarnir av kvalitetinum av serliga fiski og kjøti, tí tað er so frískt. Vit tosa um kvalitet, tú ikki finnur aðrastaðni, fortelur Leif Sørensen. Sum dømi vísir hann á føroyskan tosk, sum er nógvar ferðir fastari í tí, hevur betri lit og ein meira intensan smakk enn toskur aðrastaðni.
Sjálvur er hann ikki bangin fyri at eksperimentera við dygdarvørunum.
- Innan hesa matgerðina so at siga spæla vit okkum fram til tað endaliga úrslitið, so ja, tú kanst gott siga, at eg og mítt team í køkinum tora at ganga nýggjar leiðir, sigur Leif Sørensen.
At gera ein nýggjan rætt kann taka rættiliga drúgva tíð, um samansetingin skal vera fullkomin.
- Tað er ymiskt, hvussu vit gera. Onkuntíð stingi eg út í kortið, og so royna hinir kokkarnir at skapa rættin. Aðrar tíðir kemur onkur kokkur ella kokkalærlingur við einum hugskoti, sum eg so royni at gera. Tað kann taka nokkso langa tíð at finna fram til perfekta rættin, greiðir Leif Sørensen frá. Í royndunum at skapa nýggjar, forkunnugar rættir úr føroyskum rávørum hevur hann roynt eitt sindur av hvørjum. Sum royndarkanin heldur hann seg ikki hava smakkað nógvar løgnar rættir hóast alt.
- Í dag havi eg allar smakkirnar programmeraðar í høvdinum, og so seti eg saman út frá tí. Higartil hevur tann leisturin riggað væl, so nei, sum gastronomisk royndarkanin havi eg ikki havt tað strævið, sigur Leif Sørensen og flennir.
