Lionel Messi, Neymar, Mario Balotelli, Robin van Persie, Karim Benzema og Arjen Robben hava longu sett dám á HM endaspælið í Brasil við at skjóta mál. Í kvøld skal so heimsins besti fótbóltsspæalri á vøllin, tá Cristiano Ronaldo og Portugal skulu spæla móti Týsklandi.
Cristiano Ronaldo hevur verið darvaður av skaða í knænum í eina tíð. Hetta ávirkaði endan av kappingarárinum í Real Madrid, og óvist hevur verið hvørjum standi liðskiparin hjá Portugal er í.
- Eg eri klárur til HM endaspælið. Eg havi vant í fleiri dagar og tað kennist væl. Tað er ikki ein tann einasta løta í míni yrkisleið, har eg ikki havi spælt við pínu. Tað er prísurin í fótbólti, sigur Cristiano Ronaldo.
Myndir av Cristiano Ronaldo við ísposa á knænum fóru kring heimin, men líkt er til, at Cristiano Ronaldo er klárur til dystin í kvøld.
Spurdur um hann hevur nakað at prógva, nú fleiri av hinum HM stjørnunum hava skotið mál, svaraði Ronaldo róligur:
- Hygg eftir mínum statistikki og mínari søgu – eg havi einki at prógva. Mín yrkisleið higartil hevur verið framúr, og eg ynski at tað heldur fram, sigur Cristiano Ronaldo.
Portugal og Týskland eru í bólki G saman við Ghana og USA.
