Annegret Kramp-Karrenbauer, sum er forkvinna í týska CDU stjórnarflokkinum, tekur seg aftur sum valevni til at fylgja eftir Angelu Merkel sum týskur samveldiskanslari.
Tað sigur hon í dag á tíðindafundi í Berlin.
Hon verður sitandi sum floksforkvinna, til eitt annað valevni er funnið, sigur hon.
Hon vil eisini verða sitandi sum verjumálaráðfrú restina av valskeiðnum. Tað er val til samveldistingið næsta ár.
– Eg komi við hesum boðunum í dag, eftir at eg leingi hava umhugsað avgerð mína, sigur hon.
– Floksleisla og kanslarakandidaturið skal vera hjá einum og sama persóni, sigur Annegret Kramp-Karrenbauer.
Tann 57 ára gamla Annegret Kramp-Karrenbauer verður ofta umrødd við forbókstavunum AKK. Hon gjørdist nýggjur floksleiðari eftir at Merkel legði frá sær í 2018.
Hon tekur seg aftur eftir fleiri tap hjá CDU við landspartaval. Flokkurin hevur serliga mist umboðan í fleiri landsprøtum í eystara parti av Týsklandi.
Hon sigur, at hon ikki heldur, at avgerð hennara fer at skaða støðufestið í stjórnarsamgonguni, har konservativi CDU arbeiðir saman við bayerska systurflokkinum CDU og Javnaðarflokkinum SPD.
Avgerðin um at taka seg aftur frá floksleiðsluni kemur eftir landspartavalið í Thürningen, har rættilig kreppa kom í hjá stjórnarflokkinum.
Her valdi flokkurin hjá Merkel at samstarva við høgrasinnaða flokkin Alternative für Deutschland (AfD), sum førdi til stríð millum floksleiðsluna í Berlin og leiðarar í landspartinum.
– Einhvør nærkan móti AfD ger CDU veikari, sigur AKK í dag.
Hon leggur afturat, at støða henara til innflytarakritiska flokkin er púra greið.
– Tað má einki samband vera millum okkum og AfD, tað má ikki vera nakað samstarv við AfD, sigur hon sambært týska blaðnum Die Zeit.
Merkel fanst í síðstu viku somuleiðis at hendingunum í Thürningen.
– Tað er ófyrigeviligt, og tað skal takast aftur, segði Merkel um samstarvið millum floksfelagar hennara í Thürningen og AfD.
Sum floksleiðari eydnaðist tað ikki AKK at loysa flokskreppuna á einum kreppufundi við floksfelagarnar í Thürningen.
Verjumálaráðstarvið í týsklandi, sum AKK situr í, hevur mangan avbjóðingar við sær. Millum annað tí at týska verjan, Bundeswehr, hevur verið merkt av søgum um høgravíðgongd og vánaliga útgerð.
/ritzau/dpa
