EB/Streymur og trúføstu viðhaldsfólk teirra eru á veg av Sandi og til hús við trivaligum 4-0 sigri.
Øll málini vórðu skorað í 2. hálvleiki. Fyrst skoraði Hans Pauli Samuelsen tvey mál, og síðani var tað toppskjúttin í Vodafonedeildini, Arnbjørn Hansen, sum skoraði tvær ferðir.
Í síðsta umfari eigur EB/Streym heimavøll ímóti B68. EB/Streymur er trý stig aftanfyri HB. Um EB/Streymur skal vinna FM, so skal tað laga seg soleiðis, at teir í Sundalagnum vinna fulla úrtøku, og at B36 vinnur ímóti HB.
Um tað verður soleiðis, so fara HB og EB/Streymur at vera jøvn í stigum, men teir í Sundalagnum hava betri málmun.
-----------
85 min.
0-4
Arnbjørn Hansen hevur umsett brotsspark til mál. Dómarin bríkslaði, eftir at Arnbjørn Hansen varð feldur.
-------
80 min.
0-3
Tíggju minuttir undan leikloki hevur toppskjúttin Arnbjørn Hansen økt um leiðsluna, eftir at innskifti Sorin Anghel hevði spælt hann leysan. Sorin vann bóltin av B71, sum ætlaði sær í álop.
----
65 min.
0-2
Alt bendir á, at tað fer at eydnast EB/Streymi at vinna fulla úrtøku á Sandi. Hans Pauli Samuelsen hevur skorað eina ferð aftrat og er harvið tvífaldur málskjútti.
---------
60 min.
0-1
Stutt eftir steðgin eydnaðist tað EB/Streymi at fáa hol á. Málskjútti var síðuspælarin í vinstru, Hans Pauli Samuelsen, sum av brotsteigarmarkinum snildisliga sendi bóltin framvið Predrag Markovic í B71 málinum.
---------
Hálvleikur
0-0
EB/Streymur hevur verið leikliga omaná, men tað eydnaðist teimum ikki at skjóta mál.
---
Nú hálvur tími er farin, er støðan á Sandi framvegis málleysur javnleikur.
Líkindini at spæla fótbólt eru góð á Sandi, har tað bæði er turt og ræpttuliga stilt.
EB/Streymur hevur verið greitt omaná higartil, og teir hava havt møguleikar, men tað er framvegis málleyst.
