Harafturat kom mánadagin fram, at talan er um týðandi broytingar á deildini, og at ein partur av arbeiðnum skuldi leggjast út kring landið. Um so er, ella ikki, er ikki greitt. Stjórin á Toll- og Skattastovu hevur rætt í tí, at leiðslan hevur tryggjaðan rætt at skipa og býta arbeiði. Hinvegin sigur sáttmálin eisini, at skulu týðandi broytingar gerast á einum stovni, skulu starvsfólki hava hetta at vita.
Eingin viðmerking skal gerast til tær viðmerkingar og áskoðanir, sum eru komnar fram frá ávikavíst formanninum í Starvsmannafelagnum og stjóranum á Toll- og Skattastovuni. Hetta eru pástandir ímóti hvørjum øðrum og ringt er at skilja ímillum. Tó tykist tað ov lítið semjusøkjandi, tá stjórin á Toll- og Skattastovu Føroya heldur fast um, at hann hevur einki at tosa við starvsfólkini um, og tá hildið verður fast um, at álitisfólkini hava brotið sáttmálan.
Tað skilst, at álitisfólkini hava í longri tíð roynt at fingið deildarleiðaran á tal um ónøgdina. Tá tað ikki eydnaðist, vendu tey sær til sítt fakfelag fyri at fáa hjálp. Og tað er m. a. tað vit hava okkara fakfeløg til. Tá tey eftir ynski frá Starvsmannafelagnum biðja starvsfólkini koma á fund við felagið, verða tey burturvíst fyri sáttmálabrot!!! Skal hetta takast sum sáttmálabrot, so eru nógv sáttmálabrot framd millum ár og dag. Burturvísing merkir sambært sáttmálanum, at tey eru víst burtur frá arbeiðnum frá dags dato uttan nakra uppsagnarløn ella uppsagnartíð.
Góðtekur Starvsmannafelagið hetta, so rýkur ikki bara álitsmannaskipanin, men ein stórur partur av fakligu rættindunum. Og tað merkir, at arbeiðsgevarar kunnu skalta og valta, sum teir vilja við arbeiðs- ella starvsfólkum. Tí má felagið halda fast um hesa støðuna, og tað fær felagið fulla undirtøku frá øllum øðrum fakfeløgum. Harafturat tykist løgtið, at leiðslan á Toll- og Skattstovuni ikki kann tosa við felagið. Tað er ein heilt vanlig mannagongd, at tá stígur er komin í, at fakfelagið kemur uppí.
Men tað, sum ørkymlar mest, er, at tað fæst ikki at vita, hvør veruliga orsøkin er til arbeiðsósemjuna. Finnið nú eina semju og leggið størri dent á ein veruligan starvsfólkapolitikk. Trupulleikin ber brá av vantandi samstarvi og leiðslupolitikki.
