Tá Margreta, drotning, á miðdegi í dag var gestur hjá Tórshavnar Kommunu, nýtti Heðin Mortensen, borgarstjóri, høvið at handa hennara hátign eina gávu frá kommununi.
Gávan var ein taska, sum føroyski sniðgevin, Malan Fosaa, hevur evnað til.
Taskan er gjørd úr ymiskum tilfari úr útnorðri. Okkurt er kópaskinn úr Grønlandi, okkurt er steinbítaskræða úr Íslandi og føroyska íkastið er laksaskræða.
Í morgin vitjar hennara hátign Sandoynna. Vitjanin byrjar klokkan 09.45, tá Dannebrog leggur at á Sandi. Har fer hon at vitja listasavnið, Gívunarspor, Grótbík, Sandabrekku, kirkjuna og í Slavansdali.
Klokkan 13 fer Dannebrog aftur til Havnar.
