Sunnudagin spældi besta liðið hjá TB á fyrsta sinni á nýggja heimavøllinum við Stóra í Trongisvági, har fitt av fólki var komið saman at heiðra nýggja vøllinum og stuðla liði sínum. Tað var TB-legendan, Kristian Olsen, sum eftir stutt hátíðarhald undan dystinum sparkaði fyrsta bóltin á nýggja og stásiliga vøllinum.
TB á odda
Dystarbyrjanin var jøvn, men tað var TB, sum fyrstu løtuna var treiskara liði og eftir fimm minuttum legði eitt lítið trýst á ÍF-málið. Tvey hornaspørk á rað vóru nokk til at gera álvara av hóttanunum, tí tá sendi serbiskt samanspæl TB á odda 1-0 eftir bara seks minuttum. Bojan Timic skeyt hornaspark innfyri, har Dimitrije Jankovic fangaði ein leysan bólt og smekkaði hann í málið. Hann gjørdist harvið fyrsti málskjútti á nýggja vøllinum við Stórá.
Eftir málið var greitt, at TB ætlaði sær at verja um leiðsluna og legði ikki nógv fyri í álopspartinum. ÍF vann sær greiða yvirvág í spælinum og hevði eisini góðar málmøguleikar at javna. Eftir at Rógvi Joensen hjá TB hevði hótt við langskoti, var tað Simon Skibsted í hinum endanum, sum eftir samanspæl við Dánjal á Lakjuni fekk helst besta málmøguleikan í dystinum, men leysur í feltinum skeyt hann bóltin beint framvið málinum.
Hálvleiksstøðan var 1-0 til TB.
ÍF bara misnýtti
Í seinna hálvleiki helt ÍF fram við at vera spælstýrandi liðið og nærmast hevði eitt heilt og langt álop á TB-málið. TB lá langt afturi á vøllinum og dúvaði upp á skjótálop, har kvikir mans sum Gilli Sørensen, Poul Ingason og Bojan Timic kundu gera seg galdandi.
Men tað var ÍF, sum sat á øllum og hevði eisini hópin av málmøguleikum. Simon Skibsted hevði tvær góðar royndir, men hvørki við skoti ella lyftum skoti megnaði hann at fáa bóltin inn um málstrikuna. Tað megnaði Dánjal á Lakjuni eiheldur, tá ið hann meistarliga varð spældur leysur av Bartali Eliasen, sum varð fluttur í álopið ímóti dystarenda. Skotið hjá Dánjali fór beint við síðuna av málinum.
Tað málið, sum TB fekk eftir bara seks minuttum, gjørdist nevniliga – hóast eina ørgrynnu av málmøguleikum – einasta málið í dystinum og vann TB tískil sín fyrsta dyst í Effodeildini. Og kundi tað verið ein betri dagur enn júst tann dagin, nýggi vøllurin bleiv innvígaður?
Við sigrinum lyftir TB seg upp um NSÍ og er á 8. plássið, men ÍF dragnar í oddastríðnum og er á einum deildum triðja plássi.
