Týsdagin var dagurin, tá atkvøðurnar frá fólkatingsvalinum skuldu fínteljast. Hetta varð gjørt á Hotel Hafnia.
Millum tey, sum taldu upp var ein kend havnarmynd, fyrrverandi KFUK-skrivarin, hin 81 ára gamla, Jona Henriksen. Hóast komin væl upp í árini bilaði henni ikki hugur at halda á, til seinasta atkvøðan var fíntald seint um kvøldið.
Úrslitið av fínteljingini sæst aðrastaðni í blaðnum í dag.
Formaðurin í valnevndini, Olaf á Stongunum var eina ferð hjá henni og spurdi, um hann skuldi hjálpa henni við teljingini.
-Nei, tað er ikki neyðugt. Hetta klári eg sjálv, segði hon, meðan hon dúgliga taldi og hugdi eftir teimum túsundtals atkvøðuseðlunum.
Eitt satt konubrot, má sigast!
